Daily Newspaper

CHANCHIN TAWI

13

Chawimawina hlan
National Integrated Forum of Artists & Activists (NIFAA) Siaha District chuan nimin khan Siaha-ah India rama NIFAA kum 20 tlin lawmna pualin Siaha district-a Covid-19 dona kawnga thawk tha leh kumin chhunga thingtiak 20 aia tam phunte chawimawina an hlan a. MADC executive member L.Prisila chuan a hmanpui. Covid-19 dona kawnga hmalatu Mara Thyutlia Py (Mara Thalai Pawl) Gen. Hqrs. leh Joint Village Council bakah Covid-19 dona kawnga volunteer mi 18 leh Siaha district-a kumina thingtiak 20 aia tam phun pawl, mimal leh kohhran 12 hnenah chawimawina an hlan a ni.

Siahaah Covid kai awm lo
Nimin, September 25 tlai khan Siaha District CCC-a Covid-19 kai enkawl hnamdang pakhat chu hri a kai tawh lo (negative) tih hriatchian a nih hnu ah CCC atang hian chhuahtir a ni a, heti hian tun dinhmunah Siaha district-ah Covid kai vanga enkawl lai an awm tawh rih lo. Nimina Siaha District Hospital TrueNat labaratory-ah sample 16 test chu a negetive vek tih sawi a ni bawk.

Crore 21.29 lut
Covid-19 dona atan nimin, September 25 thleng khan Chief Minister’s Relief Fund-ah cheng vaibelchhe 21.29 a lut tawh a, Committee on Utilization of CM Relief Fund for COVID-19 in ruahmanna a siam thin anga hman tawh zat chu Rs. 19,34,48,588 a ni. Aizawl South-III bialtu MLA Prof. F. Lalnunmawia chuan Covid-19 dona atan CM Relief Fund-ah hian thla li (May – August) chhunga a thla bi hlawhpui atanga zaa 30, a vaiin Rs. 1,94,760 (thla khata Rs. 48,690) a chhunglut.

Complex hawng
Serchhip Khawtetlanga Judicial Officers’ Residential Complex chu chu nimin khan Gauhati High Court judge, Justice Michael Zothankhuma leh Justice Nelson Sailo, Serchhip district portfolio judge-ten an hawng. He complex hi Mizoram PWD enkawlna hnuaia sak a ni a, quarters grade I, grade II leh grade III te awmin sum sanction nuai 422.70 hmanga sak zawh a ni.

VC-te inzir
Lunglei district-a village council president leh treasurer thlantharte pualin Zirtawpni khan Mizoram State Finnance Commission chungchang leh account vawn dan inhrilhhriatna, a thawhkhatna chu neih tan a ni a. Chawhma lamah Thorang assembly biala VC 36 leh chawhnu ah West Tuipui assembly biala VC 17 hnenah zirtirna hi pek a ni.VCP leh VC treasurer training-te hnenah hian MSFC atangin khawtlang hmasawnna tur hna work order pek nghal an ni.

Freedom Run
Khawzawl district bawrhsap office buatsaihin nimin zing khan Khawzawla infiammite tan ‘Fit India Freedom Run’ neih a ni a, km. 3.5 a thui an tlan a, an vaiin mi 46 an tlan a ni. District bawrhsap Pu Zothanmawia chuan a vailiam a ni. Ruahman dan chuan vawiin, September 26 hian Khawzawla sawrkar department hrang hrang leh NGO aiawhte Fit India Freedom Run pualin an tlan ve leh dawn a ni.

(THE AIZAWL POST – Tualchhung)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy