Daily Newspaper

CHANCHIN TAWI

17

Chhunfin hnai
MPC leh PRISM Party Joint Committee chu Inrinni khan an thukhawm a. Party pahnihte, party pakhata inchhunfin tura ruahmanna peihfel tawhin kumin October 6 khian inchhunfinna programme hi hman turin an rel. Hemi ni hian party hming leh hruaitu chan chang tur hming pawh puanchhuah nghal an tum a ni.

Khuar hnawh
Inrinni khan Serchhip District Truck Owners Association (SDTOA) chuan National Highway 54, Serchhip Sailiam piaha kawng khuar nasa lutuk chu hnatlangin an hnawh.

Hawng
Bairabi Rimawi Venga petrol pump bun thar Brig. T Sailo Energy Point chu Inrinni khan FCS&CA minister K Lalrinliana’n a hawng. He Point-ah hian petrol litre 20000 leh diesel litre 25000 dahkhawl theih a ni.

Covid kai 20
Mizoram Synod hnuaia Synod Mission Board missionary-te zingah September 23 thlenga an chhinchhiah danin Covid-19 kai 20 awmin, mipa 8 leh hmeichhia 12 an ni. An zingah hian dam tawh 11 awmin, enkawl mek 9 an la awm a ni.

Jail-ah nei
District Sports & Youth Office Champhai bultumin rilru leh taksa hrisel siam kawnga inzirtirna – Cardio and Fitness Training Session chu District Jail Champhai-ah Inrinni khan neih a ni a. Champhai DIPRO Dr Lallawmkima’n jail tangte rilru leh taksa hrisel an neih a pawimawh chhan sawiin, fuihna thu a sawi bawk. Champhai District Bodybuilding and Fitness Association hruaituten hmanpuiin, fitness trainer-ten jail tangte hi Cardio and Fitness Training an neihpui zui a ni.

VDP-in Heroin man
Chhingchhip Mualpui VDP chuan Inrinni khan Chhingchhipah Heroin hawng 3 an man a, a neitu nia sawi mi pahnih an man bawk.

Thudawn danin, Chhingchhip Mualpui VDP hian Champhai lam atanga ruihhlo tawlhruk ching an awm tih hriain, tlaivara zan hnih an chan hnuah, September 26 khan Heroin tawlhruk hi an chang chhuak a, a neitu nia hriat Vanlalmawia (35), Chhingchhip Mualpui leh a nupui Lalthlamuani (37), Hnahlan khawchhuak nia insawite chu an man a ni.

An pahnih hian Serchhip Excise & Narcotics Department kutah hlan niin, ND&PS Act hnuaiah thubuai siamsak an ni.

Ni hnih chhungin mi 84 chhuak
Inrinni leh Pathianni khan Covid-19 kai avanga enkawlna hmuna lut, dama chhuahtir mi 84 an awm.

Heng zinga 57 hi September 27-a CCC/DCHC hrang hrang atanga chhuahtir an ni a. An chhuah tamna ber hi CCC Beraw Tlang niin 20 an chhuak. ZMC atangin 10, JNV CCC Thingsulthliah atangin 7, CCC Mamit 1, Community CCC Tuikhuahtlang 6, CCC Hnahthial 3, CCC Saitual 3, Pushpak CCC Zokhawsang 1, CCC Darlawn 1, Finance Building CCC ITI Veng 3 leh CCC Tanhril Presbyterian Kohhran Hall 2 a ni. September 26 khan CCC/DCHC hrang hrang atangin 27 an chhuak bawk a. CCC Thingdawl 5, CCC Lawngtlai 2, Tribal Art Centre CCC Tanhril 16 leh ZMC 4 a ni.

Press Club sak mek tlawh
Serchhip MJA-ten Press Club an sak mek chu Inrinni khan advisor to chief minister Pu C Lalramzauva’n a tlawh.

MJA Serchhip District hian Press Club building sak mek chungchang leh mamawh thenkhat an lo sawipui a. Advisor to CM hian Press Club-a hman tur chair engemawzat chu Sechhip MJA hi pek a tum tih a sawi.

Serchhip Press Club sak mek hi hrileng vangin a sak chhunzawmna tur sum hmuh tura beiseite tum anga hmuh theih a nih tak loh avangin, luah lailawk turin kawng an chauh buatsaih fel a ni.

Thlang
Korfball Federation of India office bearers thlanchhuahah vice president atan Mizo pa, Dr Lalzirmawia Chhangte, IAS chu thlan a ni. Korfball hi International Olympic Association-in sports discipline pakhata a pawm zing ami niin basketball ang deuha khelh, a khelh dan phung, ball leh basket erawh inang lo a ni.

MHIP-in vengchhung tifai
MHIP Mamit Luangpawl branch chu Inrinni khan an vengchhung tifaiin an hnatlang.
MHIP Sub-Hqrs Mamit conference-in kumpuan atana an hman ‘Faina leh Thianghlimna’ bawhzuiin Mamit district-a MHIP branch hrang hrang chuan thla tin vawikhat tal vengchung tihfai hnatlang an nei thin a; Mamit Luangpawl MHIP pawhin hemi ang hian vengchhung tihfai hnatlang hi an nei a ni.

(THE AIZAWL POST – Tualchhung)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy