Daily Newspaper

CHANCHIN TAWI

30

Hrileng do tura inpete chawimawi
October 4 khan Venghnuai Local Level Task Force chuan Rokunga Hall-ah an veng mi, Covid-19 dova medical frontline worker atana inpe mi pathumte chawimawina hun an hmang a, chawimawina thuziak leh pawisa fai an hlan. Venghnuai Covid Care Centre-a volunteer nurse duty pawh kar hmasa lam khan chawimawina an lo hlan tawh.

Tlahlum
Nimin, October 4 chawhnu lam khan Immanuel Laltlanliana s/o Zohmingthanga, New Diakkawn AG Veng chu Bungmuallui khamah chesualin a hmunah hian a thi. Thudawn danin Immanuel-a hi a thiante 4 nen Bungmualluiah hian an kal a, a tawlhthlu palh a, a thlang khamah tlathlain a tlakna hmunah hian a thi nghal a ni. Kolasib police leh khawtlanmg mitlawmngaiten a ruang hi an lachhuak a ni.

Tuitla
Joyci Chingdeihkimi (6) d/o Job Nengkhenpaua, Champhai Vengthar chu October 2 chawhnu dar 2.30 vel khan Champhai Vengthara Roman Catholic Kohhran dilah a tlahlum. Thudawn danin Joyci hi naupang dangte nen dilah hian an cheng a, naupang dang an haw hnuah nu pakhat chuan dil kama thawmhnaw chuang awm chu hmuin, a bulhnaia hnathawkte a pun a, dil an enfiahnaah Joyci ruang hi an hmu ta a ni.

Thisen pe
Inrinni khan hengte hian a thlawnin thisen an pe. KTP Dawrpui Vengthar West chuan Central KTP hmingin Aizawl Civil Hospital tan unit 32; KTP Bethlehem Vengthlang Branch chuan an dincham vawi 26-na pualin Synod Hospital Durtlang tan unit 31 an pe; AVBD Champhai Branch leh YMA Champhai Zion Veng Branch ten National Voluntary Blood Donation Day pualin Champhai District Hospital-ah unit 24 an pe.

Bawngkawn hlip
Mizoram Epidemic Diseases (COVID-19) Regulations 2020 hnuaia kumin September 22-a Aizawl district magistrate-in Bawngkawn Local Council huamchhung containment area-a a puan chu, Chief Medical Officer Aizawl East-in rawtna a thlen angin October 4, 2020 chawhnu dar 3.30 atang khan hlih a ni tih a puang.

Lehkhabu pe
Prof. JV Hluna chuan a lehkhabu ziah ‘Chakma Homeland’ tih chu MJA Public Library-a dah turin bu hnih a pe.

TKP tawngtai
Mizoram Thalai Kristian Pawl ruahmanna-in Pathianni, October 4 tlai dar 6.00 khan ram pumah Covid-19 pualin tawngtai programme neih a ni. Thupui chhawpsa zingah Mizoramah Covid dona kawnga thawktute inpekna avanga lawmthu sawina leh, he hrileng avanga harsatna tawk leh thawktute tana dilsakna te a ni.

(THE AIZAWL POST – Tualchhung)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy