Daily Newspaper

CHANCHIN TAWI

34

89 chhuak
September 14 khan Covid-19 kai vanga enkawlna CCC/DCHC hrang hrang awm, dama chhuak mi 89 an awm. Hengte hi SRHF-ZMC atangin mi 7, Zokhawsang CCC Aizawl 2, CCC Mamit 2, AYUSH Hospital CCC Thenzawl 6, Thingdawl Polytechnic CCC 72 an ni.

Puihna sem
Mizorama Catholic Kohhran-in lirnghing tuarte tanpuina tura YMA Khawbung Branch kuta an dah cheng nuai khat chu nimin khan chhung-kaw 32 hnenah hlan a ni. Puihna hi chi li-a pek a ni a, in ruhrel chhia leh thiah ngai chhungkaw 7 hnenah Rs. 7000 theuha semin, a bakte hnenah Rs. 3000, 2000 leh 1000 a sem a ni.

In kang
Nimin zing khan Rangvamuala Joseph Rokhuma in, Assam type chu bungrua engmah chuh hman lohin a kangral. Kangmei chhuah lai hian in neitute an awmloh lai a nih avangin thi leh hliam an awm lova, kangmei chhuah chhan hi hriat a ni lo.

Heroin man
September 13 zan khan Hnahthial Police-ten heroin hawng 19 an man. Thudawn danin Hnahthial Police leh YMA Chanmari Branch Hnahthial tangdun chuan Pathianni zan dar 7.30 khan Hnahthial leh Tarpho inkar Tuichang lei chhakah bike MZ-01 L 6305 khalhtute atangin Heroin an man a, tualchhunga hralhna ang chuan an thil man hlut zawng hi Rs. 8,55,000 hu a ni. A neitu nia puh J. Rothangliana (29) leh Lalnunpuia (30), Venglai Hnahthial ve ve pawh man an ni a, Hnahthial Police Station-ah ND&PS Act hmanga thubuai siamsak an ni. Tunhnaiah Hnahthial Police hian ruihhlo an man nual tawh niin thu dawn a ni a, kumin August 20 khan Methamphetamine mum 37430, Rs. 74,86,000 hu; August 29-ah Thingsaiah Heroin hawng 18, Rs. 7,20,000 hu leh tun tuma an mante hi a ni. Ni 24 chhunga ruihhlo an man hlutna hi Rs. 91,41,000 hu a ni.

(THE AIZAWL POST – Tualchhung)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy