Daily Newspaper

CHANCHIN TAWI

11

Mask hlan
Taiwan company Kiwanis consultant Jonathan Lalremruata chuan nimin khan Serchhip district bawrhsap Kumar Abhishek hnenah Covid-19 hrileng laka invenna atan a tulna apianga hman turin mask (hmai tuamna) a hlan. Kiwanis hian India ram hmun hrang hrangah a mamawhtute hman turin mask nuai 5 a sem chhuak tawh tih an consultant hian a sawi a. Chu’ng zinga 500 chu nimina Serchhip district tana an hlan hi a ni.

Loan sanction
Mizoram Cooperative Apex Bank Ltd executive thukhawm chuan branch hrang hrangin loan an pek theih bak Head office ngaihtuah tura thlen mimal loan dilna cheng nuai 812.40 leh kohhran hrang hrang loan dilna cheng nuai 680.40, a vaiin cheng nuai 1492.80 sanction a nih thu sawi a ni. NABARD hnuaia Agriculture Infrastructure Fund hmanga PACS tihhmasawnna tura Multi-Service Centre-a hlankai dan tur leh bank hmalakna zau zawka kalpui a nih theih nan hnathawktu promotion kalpui dan tur leh thawktu thar lak belh chungchang an sawi ho.

ICU ruak
Mizoram sawrkarin Covid-19 enkawlna hmunpui ber atana a ruat Zoram Medical College ICU-ah December 4 tlai thleng khan Covid vanga harsatna tawk dahluh an awm rih lo. ZMC hotute sawi danin, nimin khan Covid-19 kai dah luh thar an awmlo a, tun dinhmunah hri kai 22 enkawl mek an ni. ICU a enkawl an awm rih loa, Isolation ward-a awm 4 ten oxygen an mamawh mek a, an dinhmun erawh a pangngai rih. ZMC-a Covid kai enkawl mek zingah kum 60 chin chunglam mi 4 leh naupang kum 14 hnuailam 3 an awm a ni.

Lei khar
Lunglei SP chuan district bawrhsap leh senior EE PWD NH Division-IV, Lunglei lehkha in a tarlan angin, Phairuangkai lei (Bailey bridge) NH-302 siamthat hna thawh mek chu thawktuten chak taka an thawh theih nan, Section 115 MV Act 1988 leh sawrkar hriattirna dinglaiin thuneihna a pek angin 2020 December 8 zing dar 4.00 atanga December 14 zan dar 11.00 thleng he leiah hian lirthei eng chi mah kaltlang phal a ni lo tih a sawi. Thupek zawm lote chu MV Act Sec.179 hmanga hrem theih an ni, a ti.

Tlangzarh
Mithiam hrang hrangin Hrawva hla an zirchianna bu, ‘Khuanu Leng Chawi Hrawva’ tih chu nimin khan Lok Sabha MP C. Lalrosanga’n a tlangzarh.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy