Daily Newspaper

CHANCHIN TAWI

7

Ngaihdam dil
Gelatin hmanga humhalh chhunga bomb hmanga sangha man chungchangah Phaizau MNF Unit hruaituten ziakin ngaihdam an dil. Thudawn danin, VC leh All NGO Joint Committee Phaizau thuchhuah neih tawh angin, Tut luidung an humhalh chhungah Phaizau MNF Unit hruaitu, Mamit bialtu MLA leh MNF Block hruaituten gelatin bomb hmanga sangha an vawm chungchangah an khawtlang humhalh chhunga an chet danah khawtlangin ziaka an lo dah tawh sa angin pawisa chawi turin an ti a ni. Phaizau MNF Unit hruaitute chuan ziakin NGO hnenah ngaihdam an dil bakah an chawitur zat Rs. 10,000 chu hun tiam a ral hmain an pe tih Phaizau VCP chuan a sawi a. Ngaihdam dilna lehkha leh pawisa chawi tur an pek hnuah erawh NGO pawhin boruak tha a awm theih nan an ngawih rih tawh thu sawiin, boruak tha lo awm zui zel lo tura an duh thu a sawi a ni.

Hawng tan
Excise & Narcotics Department chuan Covid-19 leng avanga hun engemawchen Vairengte-a an check gate chu an hawn loh hnuah December 4 atang khan an hawng tan leh a, zu leh ruihhlo endik chhunzawm a ni. Hun rei tak Covid19 avanga National Highway 306 kaltlanga lirthei khalhtute leh khualzinten zu leh ruihhlo an phurh leh phurh loh endikna check gate hi khar a ni a, kar kalta Zirtawpni zing dar 9 atang khan hawn tan leh a ni. Excise & Narcotics lama thawktute hi darkar 24 chhung duty in, check gate hawn atang hian zu case 16 man a nih tawh tih an sawi a ni.

Thisen pe
Inrinni khan hengte hian a thlawnin thisen an pe – Civil Hospital Aizawl Blood Bank tan Adventist Youth Federation (AYF) Aizawl-in unit 87; TKP Bawngkawn Unit-in unit 13 an pe a, mimala thisen pe (individual donor) mi 22 an awm bawk. KTP Zemabawk Branch-in Central KTP hmingin Synod Hospital Blood Bank tan unit 33; Lunglei Pukpui Bial PYD (NEI) in Civil Hospital Lunglei Blood Bank tan unit 51 an pe a ni.

Soil Day
Krishi Vigyan Kendra (KVK) Kolasib chuan Inrinni khan ‘World Soil Day’ an hmang a, Land Resources, Soil & Water Conservation Department district officerV. Vanlawma’n a hmanpui. He programme-ah hian Buhchangphai leh Lungdai loneitu mi 105 hnenah Soil Health Card sem chhuah a ni a; subject matter specialist (Soil Science) Dr Carolyn Zothansiami chuan loneitute hnenah zirtirna a pe a ni.

Ganja man
Myanmar atanga phurhluh nia hriat Ganja kg.55 chuang leh a phurtua puh mi pahnih chu December 4 zan khan Serchhip Sailiamkawna police duty-ten an man. Thudawn danin kar kalta Zirtawpni zan dar 11.30 vel khan Serchhip Sailiamkawna police duty-te hian khawchhak atanga truck lo lut pakhat atangin Ganja thahnem tak an man a, thingzai phurh hnuaiah Ganja hi thuhruk a ni. A phurtu nia sawi Vanlalbiaka (23) leh truck khalhtu Lawmsangliana (22) Hnahlan ve ve nia insawi te chu an chuang a, an Ganja phurhte hi Myanmar lam mi ta a nih thu leh Vanzau pengah an hmelhriatloh mi pahnihin an rawn dah niin an sawi a. Ganja phurtute lakah hian Serchhip Police Station-ah thubuai ziahluh a ni a, Ganja an man hi tualchhunga hralhna rate chuan cheng nuai 2.7 hu a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy