Daily Newspaper

CHANCHIN TAWI

10

Tlangzarh
Mizoram larsap PS Sreedharan Pillai lehkhabu ziah 125-na, Saptawnga hlaphuah dahkhawmna ‘Oh, Mizoram’ chu nimin khan video conference kaltlangin India Vice President M. Venkaiah Nadu chuan India International Centre, New Delhi-ah video conference kaltlangin a tlangzarh. He lehkhabu hi Covid-19 avanga thla 10 chhung inkharkhipna hnuaia a lehkhabu ziah 18 zing ami a ni. Larsap Pillai hian thupui hrang hrang – history, law, political science, economy, social, travelogues, poetry, satire, literature leh adt. huangah te thu leh hla a ziak thin a ni.

Thilpek
Central YMA chuan, Home/Centre leh Hospital, a vaiin hmun 23-ah Krismas denchhenin thilpek a hlan dawn. Thilpek a hlanna tur hi hospital 4 leh Home/Centre 19 ah te a ni a, a vaia an sum semchhuah tur hi Rs. 1,48,000 a ni.

Hruaitu hlanna
Mizo Students’ Union Gen. Hqrs. chuan nimin khan an pawl hruaitu tharte Pathian hnena hlanna an hmang a, Upa C. Ngurthantluanga’n hlanna hi a nei. Kum 2020-2022 chhunga MSU hruaitu thar thlante chu: president – J. Lalmuan-zuala, vice president -RK Hnuna, general secretary -Samuel Zoramthanpuia, asst. general secretary – Laldinsanga, treasurer – Lalramhluna, finance secretary – Zodinsanga te an ni.

Chawimawi
MZP Sub-Hqrs W. Phaileng chuan an khaw mi, Mizo zirlai HSLC, HSSLC, bachelor degree nei tharte leh master degree nei tharte bakah khawtual mi doctor pahnihte chu nimin khan chawimawina an hlan a, zirlai bik hi mi 102 an ni. Hei bakah hian MZP Hqrs Mamit buatsaih district huapa article inziahsiaka lawmman pakhatna latu W. Phaileng khaw mite chawimawina an hlan bawk.

Tidanglam
Health & Family Welfare Department-in ‘Covid-19 hri kai naupang, an nu/chhungten Covid-19 an kai avanga enkawl ngaite chungchang inkaihhruaina’ hriattirna tihchhuah tawh chu tihdanglam a awm a. CACCC a naupang awm theite chu, naupang Covid-19 hri kai lo, amah enkawltu a chhungten Covid hri an kai vek avanga in lama enkawltu tur rintlak/ rinngam neilote an ni a; JJ (Care and Protection of Children Act) 2015 hnuaia naupang, Child Care Institution-a lut turte an ni bawk.

Hlip
Hrileng kaihhnawihah two wheeler hmanga Mizoram state luh khapna thupek, Mizoram Home Department-in a lo tihchhuah tawh chu 2020 December 16 atang khan a hlip leh ta tih Home department hian a sawi.

Lehkhabu pe
Zonunsanga chuan a lehkhabu ziah ‘Ram leh hnam humhalh heti zawng hian’ tih chu MJA Public Library-a dah turin bu hnih a pe.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy