Chanchinbu publisher/editor atanga minister ni ta K Sapdanga chu chanchinbu semtuten lawmpuina an hlan.
Mizoram Chanchinbu Semtu Pawl chuan Vanglaini editor hlui, tun sawrkara Home minister, K Sapdanga chu Nilaini khan a office-ah chawimawina leh lawmpuina thuziak an hlan.
An pawl president PB Shiana chuan, minister ni ta Pu K Sapdanga hnuaiah kum 30 chuang a thawk ve tawh a. Ngaihdamna leh dawhtheihna a ngah zia hi sawi thiam sen a ni lo, tiin, “Amah vangin in leh lo kan nei a, kan faten lehkha an zir theih phah a, an zarah chhungkaw za tam takin ei leh bar kan hmu a ni,” a ti.
Minister K Sapdanga pawhin chanchinbu sem hna chu hna tlawm a ni loa, an zinga mi thenkhat chu mi hlawhtlinga puan, ‘Thangchhuah Tlang’ lehkhabua chawimawi tlemte zingah an tel tih sawiin, “Chanchinbu hi khawvel pumah Tv leh internet-in run mah se, a hneh thei ngai lo a, a tawpah chuan mipui hi chanchinbuah an kir lehzel. Tunah pawh hian khawvelin ‘chanchinbu nge nge chu a rintlak ber e’ tiin an kir leh mek a ni,” a ti.
Chanchinbu semten lawmpui
