Kristianten chanchintha kan hril zelna atana pawimawh, kan intodelh theihna turin Mizoramin BJP MP kan neih a ngai tih BJP Mizoram president Vanlalhmuaka chuan a sawi.
Ningania BJP State office-a MP inthlan campaign khuhhawnaah an party MP candidate ni bawk Vanlalhmuaka chuan, party thenkhatin India ram Hindu rama siam tum anga an sawi thin chungchang sawiin, “India ram hi Hindu ram sa a ni zawk tih history-ah kan hmu a, ramthim a nih vangin Tirhkoh Thoma ngei pawhin chanchintha a rawn thihchilh zawk a ni. Kristiante hian ramthim rawngbawlna tur kan ngah hle a, chuvangin political mitdawivaih hmanga BJP a ni lo zawnga bei thintute hi min hmangaih vang a ni lo tih hriain, chanchintha kan hrilna atana kan intodelh theihna turin BJP MP nei turin Mizoram mipui inbuatsaih ila, MP inthlan pawimawh ber kan hmachawn mek a ni tih hriain, BJP MP nilo, Mizoram MP ka nihna turin khawngaih taka min vote turin ka ngen a ni,” a ti.
Mizorama MP candidate ho thlirin a tha ber ni lo mah se, centre-ah BJP an sawrkar leh ngei dawn avangin BJP candidate a nih avang erawh chuan candidate dangte aiin, a awmna in a zir avang zawkin Mizoram tan a tha ber dawn tih a sawi.
“Bible-a Josefa dinhmun kan hmuh ang khan, Aigupta ramah Josefa a awm a, Kanan rama a unaute tana eitur lo pe a, Farawa dawhkanah ngei a unaute a lo hrai puar ang khan, keipawh hi Mizoram sawrkara kan CM leh minister-ten central-a thil an dil hunah anmahni pui tur leh tlangnel taka Modi dawhkan lo kilpui turin Mizoram mipui zarah MP-a thlantlin ka nih chuan chu chu ka hna tur a ni dawn a ni,” a ti.
Chanchintha hrilna atan BJP MP kan neih a ngai – Vanlalhmuaka
