Chanchintha thlen Ni pual hun
Mizorama Chanchintha thlen Ni champha pualin March 15 khan Mizoram Presbyterian Kohhran chuan hun an hmang a, tualchhung kohhran tam ber chuan zan inkhawmah hun an hmang. Kuminah hian “Chanchintha leh Mizo Hnam Nun” tih thupui thlan sa hmangin thusawituten an sawi a ni.
1891 March 15 khan Mizo zinga chanchintha hril hmasa ber, Welsh Presbyterian-in a rawih Rev. William Williams chuan Kawnpui thlanga Kutbul Kai chu a thiante nen an rawn thleng a. A thian hruaite hi Free Church of Scotland kohhran upa Benjamin Aitken (a ni hi Calcutta chanchinbu The Englishman a sub-editor a ni) bakah Assamese Kristian Kasinath leh Khasi Kristian U Khanai ten an tawiawm a ni.
Mualvum khua, khatih laia an lal Liankunga hminga ‘Liankunga khua’ an tihah Bible milem leh thuziah semin Pathian hla sa in thu an sawi a. Aizawlah lut chhoin chawlhkar 4 vel an cham a, an tawng lehsaktu chu an thlen in, Maubawk lal Dokhama a ni. Dokhama hi bawrhsapin tawng lettu atana a hman ber ‘chief interpreter’ a ni. Aizawlah hian Mizote bakah kawng laia hnathawk hnam hrang hrang zingah chanchintha hrilin Bible milem leh thuziah an sem a ni.
Mizorama chanchintha hrila hun puma hmang tura a inbuatsaih laiin, 1892 April 21 khan Shillong atanga km.25 vela hla Mawphawng khua-ah Rev. William Williams hi khawsikpui vangin a thi a ni.
March 15 chu Mizorama Chanchintha lo thlen ni atan kum 2012-a Synod Inkhawmpuiin a rel angin kum 2014 atanga hman a ni a, kumin hi Chanchintha lo thlen atanga kum 134-na a ni. Rev. William Williams-a’n khatih laia Sap hoin Lusei ram (Lushai country an tih mai) Mizoram a rawn thlen ni hi Mizoram Presbyterian Kohhran chuan Mizorama chanchintha thlen ni atan a pawm a ni.
Chanchintha thlen Ni pual hun
