Pachhunga University College Zoology department-a researcher-te chuan changpat chi thar, khawvel hmun danga la hmelhriat ngai loh an hmuchhuak a. Khawrihnim atanga hmuhchhuah a nih angin a khaw hming chawiin ‘Eutyphoeus rihnimensis’ tih vuah a ni.
Thudawn danin, Eutyphoeus rihnimensis hi kum 2017 khan Khawrihnimah hmuh a ni a, kum 2021-ah Mamit leh Dampuiah hmuh leh a ni. A anpui Eutyphoeus changpat nen ngun taka zira khaikhin a nih hnuah a danglamna hmuhchhuah a ni a. A pianhmang leh kawchhung lam leh DNA chiang zawka zirchian niin, a chanchin ziahna hi journal-ah mithiamte endik tura thawn a ni a, changpat chithar ngei a ni tih an finfiah a ni. Kumin March 13 khan New Zealand atangin Zootaxa Journal-ah tarlan a ni.
He changpat chi thar – E. rihnimensis hi an anpui changpat dangte laka an danglamna langsar ber chu, a taksa hmalam hnuai lama a pa serh chu kutzungtang pali angin a rawn chawrchhuak a. A DNA barcode atang pawhin chiang takin a hmaa changpat hriat tawhte lak atangin a danglam tih hriat a ni.
Hetiang changpat hi lei chhung cm.15-30 vela thukah an awm tlangpui a, a puitling hi pencil tiat vel niin, mm. 105-149 a seite an ni a. A sen-uk rawng kai niin, hnim tawih ei chi, fur tawp lama vakchhuak nasa zual thin an ni.
Kum 2005 khan changpat chikhat – Eutyphoeus mizoramensis chu PU College Department of Zoology hian a lo hmuhchhuak tawh a. Prof H Lalthanzara leh a thawhpuiten Mizoramah changpat chihrang thahnem tak a awm thu leh an la zir chhoh mek thu an sawi.
Changpat chi thar hmuchhuak
