Daily Newspaper

Chapchar Kut post souvenir ‘Nghilhloh Bu’ tlangzarh

7

2020 Chapchar Kut post souvenir – Nghilhloh Bu tih chu Thawhlehni khan chief minister Zoramthanga chuan a tlangzarh.

Chief minister chuan Chapchar Kut chu kan culture min thuikhawmtu zinga pawimawh tak a ni, tiin, sawrkar atang pawhin hetah hian sum awm ang ang atangin tlin chin chin hman a ni thin, a ti.

State dang pawhin an hnam ziarang chawisanna – cultural festival theuh an lawm thin angin Mizote pawhin kan Kut pawimawh hi ropui takin hman atangin kan lo lawm tawh thin tih Zoramthanga hian a sawi a. “Culture hian hun kal zelah hma a sawn ve zel a, midang tihdan laa pawlhdal lam niloin, amah hi a thangin hma a sawn zel angin, kan culture phochhuahna ber Kut kan lawm dan pawh hian hma sawn ve zelin, state dang leh ram danga kan unaute tan pawha chhim manhla lehzuala siam a pawimawh a ni,” a ti.

Mizo hnam ziarang leh nunphungah hian midang tan entawntlak tak tak a awm tih chief minister hian a sawi a. Tun Covid hrileng karah pawh state dangte nen khaikhin chuan Mizoram chu hma la tha ber a nih thu te, hei hi a chhan pawimawh tak chu mipui tanrualna leh tlawmngaihna, inthununna nei tha kan nih vang nia a rin thute a sawi.

I&PR director Lallianpuii chuan kum dang anglo takin kumin chu hrileng avang leh thildang dang vangin Chapchar Kut lawm hnu lawka souvenir tlangzarh tum chu a khawtlai phah ta tih a sawi a ni.

Chapchar Kut 2020 souvenir tlangzarh tak hi phek 114 niin, thuchah leh Mizoram hmun hrang hranga kumin Chapchar Kut lawmna hlimthla engemawzat dah a nih bakah thuziak mi hrang hrangte article 13 a awm a ni.

(THE AIZAWL POST – Tualchhung)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy