NABARD RIDF-XXVI sum cheng nuai 299.5 hmanga siam Chawngtlai Water Supply Scheme (Solar Pumping) chu Thawhlehni khan PHE changtu deputy chief minister Tawnluia’n a hawng.
Chawngtlai mipuiin tuilakna tha tak an nei thei chu a lawmpui tih deputy chief minister hian a sawi a. A hlawhtlin nana hma latu department thawktute chu fakawm a tih thu a sawi. Chawngtlai khua chu Mizo hnam zia leh nunphung chawisan leh vawnnun kawngah entawntlak a tih thu a sawi bawk.
Chawngtlai WSS (Solar Pumping) hi 2021 December 17 khan HS Construction-in a thawk tan a, 2022 November 16 khan hna hi zawh a ni. Libial Kawr tui ni zung chakna hmanga lak niin, solar panel 60, kWp 19.8 a chak hmanga thuam a ni. A pump-na hmun bakah khawchhungah hian tui dahkhawlna litre nuai khat dawng siam a ni a, mihring 3347 chawm zo tura ruahman a ni. Tunah hian JJM kaltlangin in 394-ah tui pek mek a ni.
Libial Kawr tui lakna bakah hian NABARD leh JJM atangin Chawngtlai tui lakna thin hmun li – Zotui Kawr – Ngotekherh, Tuivamit – Venglai rin, Khawchhung tlang leh Vengthlang tuikhur – Phai Veng chu pipe lian zawk, mm 80-a thlak vek an ni.
Chawngtlai tui lakna siam zo
