Daily Newspaper

Chelh theih loh United leh Fernandes

17

Thawhleh zan khan English Premier League-ah inkhel pakhat a awm a, Manchester United chuan khualmualah phu taka hnehna changin pangna an luah let leh. United a harhna thlentu Bruno Fernandes chuan goal hnih thun in, a team a fuih phur chhunzawm zel. Paruknaa tlathla hman United hian 15-a ni mek Brighton & Hove Albion chu khualmualah an hmachhawn a, tha taka inlan in, si thum faiin hnehna an chang. Khualmualah phu taka hnehna an chan leh tak vang hian champions league khelh phak an beiseisang zui zel a, an chunga awm Chelsea aiin point hnihin an hniam zawk mek. Vawiruk khelh hmabak an la nei a, top 4 huanga inhlankai chu an tum lian ber a ni. Brighton mual Amex Stadium a inkhelah hian Ole Gunnar Solskjaer a team ten bul an tan tha hle. Minute 16-naah rawlthar Mason Greenwood chuan hmahruaina goal a thun nghal der. Hma taka goal an thun vangin khualmualah inringtawk leh nuam ti takin an inlan chhunzawm. Minute 29- naah United-a harhna thlentu Bruno Fernandes chuan an goal hnihna a thun a, Red Devils tan a chetha chhunzawm zel. Greenwood leh Fernandes te goal thun hmangin United hi si hnih faia hmahruai chungin chawlhlawk an hmang. Chawlhlawk hnu lamah pawh United in bul an tan tha zui leh pek hle. Minute 50-na lekah Bruno Fernandes chuan an goal thumna thunin, an chakna a nem nghet. Fernandes hian boruak hniam hman tak United hi Janaury thla khan a zawm a, goal nga a thunsak der tawh. Brighton mualah phu taka hnehna an chan leh tak vangin United hi inelna hrang hrangah vawi 15 zet tlawm nei lovin an kaltluang mek. Season kalmekah Bundesliga champion thar Bayern Munich chu khelh 25 zettlawm an nei lovin an kaltluang a, inelna hrang hrangah tlawm nei lova kaltluang rei ber niin, pahnihna chu United hi an ni. United hmahruaina goal thuntu kum 18 mi Mason Greenwood khan season kal mekah United tan goal ruk a thun tling tawh a, kum 18 mi zingah Wayne Rooney hnu lamah season khat chhunga goal ruk thun tling leh thei hmasa ber a ni. United leh England Striker ropui Rooney khan 2003-04 khan Everton tan kum 18 mi ni chungin goal kua zet a thun tling. United in january thlaa an lakluh Bruno Fernades chuan February thla atang khan a team thar tan a khel tan a, goal ruk thun tawh in, assist vawili a nei tawh bawk a. February – July chhungin ani aia goal a inrawlh tam an awm lo. Pangana luah let lehtu United hian inrinni zan khian team talbuai AFC Bournemouth an hmachhawn zui leh dawn a, Old Trafford-ah hnehna chang leh ngei tura ngaih an a, UCL an hnaih leh zual sawt a rinawm.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy