Chelsea 1 – 1 Liverpool

Pathianni zana English Premier League (EPL) inkhel ngaihven hlawh takah Stamford Bridge-a inkhel Chelsea leh Liverpool te chu 1-1 in an inhnehtawk. Pathianni zana inkhel dangah manager thar Ange Postecoglou hnuaia inlan Tottenham in hnehna an chang zo bik lova, Gtech Community Stadium-ah Brentford nen 2-2 in an inhnehtawk.
Blues in tlawm an pumpelh
Season liam taah beisei phak lo, chhe taka season hmang zo Chelsea in EPL 2023-24 season-ah khingpui hautak neiin bul an tan a, an mual Stamford Beidge-ah Liverpool mikhual inm fiahna hautak an hmachhawn nghal. Inkhel hmuhnawm takah Liverpool in bul an tan tha a, goal thun hmasa zawk an ni. An mualah goal chhuah hmasa zawkah tang mah se manager thar Mouricio Pochettino hnuaia inlan Blues in an si phurh an sut a, an mualah tlawm an pumpelh.
Stamford Bridge-ah point thum hmuh tuma inlan Liverpool in bul an tan tha viau a, inkhel tir lamah hlauhawm an siam nghal. Saudi Pro-League club sawmna mawm tak hnar a, Reds tana rinawm Mohamed Salah chuan goal thun theihna hun remchang a neih a chhawr tangkai zo lova, goal bar a pet per dawp. Hemi hnu lawk hian Reds midfielder thar Alexis Mac Allister chuan fuh zetin Salah ball a pe a. Aigupta tlangval Salah hian Luis Diaz tan tha zetin a chhawpsak zui a, Diaz hian lei hrulah tha zet-a pet goal in, minute 18-naah hmahruaina goal a thun.
Mimualah goal thun hmasa zawka an tan vangin Liverpool an phur a, an khingpuite an nawr na zui viau. Na taka an khingpuite an nawr an chhawr tangkai a, goal an thun belh leh. Mihamed Salah goal thun chu VAR rawn a nih hnuin hnawl a ni a, Chelsea an him hlauh a, dinhmun chhe leh zual zawka tluk luh an pumpelh. Goal an chhuah nawn leh hian Chelsea a thawng harh zawk a, tho thang tha leh tumruhna nasa zawk nen an mikhualte an nawr zui nghal zat. AS Monaco atanga an lak luh Axel Disasi chuan minute 37-naah vanneihthlak angreng takin a pet goal a, hnai tak atanga a pet goal hmangin an si phurh a sut. Disasi hian a club thar tan a khelh hmasak berah goal a thun nghal a, hei hian inrintawkna sang zawk a pe ngei ang. Axel Disasi hi Chelsea tan EPL-a khelh hmasak bera goal thun nghal thei 26-na chiah a ni. Chelsea in RB Leipzig atanga an lak luh Christopher Nkunku chuan hliam vangin EPL a hmachhawn thei lo va, Pre-season-a chetha tak Nkunku hi an thatpui ngei a rinawm bawk.
Disasi goal thun hnuin Chelsea hian goal dang an thun belh ve leh a, offside vangin hnawl a ni ta thung a, 1-1 a inhnehtawk chungin chawlhlawk an hmang.
Chawlhlawk hnu lamah inkhel a hmuhnawm chhunzawm a, goal thun tumin an innawr tawn nasa hle. Chelsea manager thar Pochettino chuan an captain thar Reece James a thlak. James chhuah hnua an captain Ben Chilwell pawh a thlak zui ve leh a, Liverpool an hmachhawn tum hian mi pathum ngawtin captain ban hren an hreng hman. Liverpool manager Jurgen Klopp chuan an player pawimawh Mohamed Salah a lachhuak a. Salah hian thlak a ni chu a hrethiam lova, a thinrim zui hle nghe nghe.
Inkhel hmuhnawm takah hian hun tawp dawn hnaihah Liverpool in goal thun theihna hun tha an nei a. Bench atang lut Darwin Nunez chuan ball a dawn that loh vangin an hun tha zet mai chu ho lam takin a khawhral a, team lian Chelsea lakah point thum an hlawhchhuah loh phah. Tichuan, EPL 2023-24 season ah Super Sunday hmasa bera inkhel hmuhnawm tak chu 1-1 in a tawp zui ta a ni.
Tottenham an chak zo lo
Manager thar Ange Postecoglou leh Captain thar Son Hueng-min kaihruaina hnuaia an inlan hmasak berah Tottenham chuan Brentford an hneh zo lova, 2-2- in an inhnehtawkpui.
Gtech Community Stadium-a lenglut Tottenham hian bul an tan tha a, goal an thun thuai. Inkhel tan atanga minute 10-na lekah James Maddison siamsak atangin Cristian Romero chuan hmahruaina goal a thun. Hma taka goal an thun vangin inrintawkna sang zawk nen an inlan zui a, an khel chhe lem lo viau naa an chak zo bik lo.
An mikhual lakah hma taka goal an chhuah hnuin Brentford hian minute 27-naah penalty an hmu. He penalty hi Bryan Mbeumo chuan a pet goal a, an si phurh a sut. An si phurh an sut hnuin an khel tha zui viau a, goal thun hmasa zawkah an tang zui leh. Minute 36-naah Yoane Wissa chuan Henry siamsak atangin hma an hruai letna goal a thun.
Hnufual zawk an nih hnuin Tottenham in goal an thun leh thuai a, minute 45+4-ah Emerson Royal chuan James Maddison siamsak atanga goal thunin an si phurh a sut. Second half-ah goal dang a luh belh tawh lova, 2-2 in an inhnehtawk. Spurs hian an player pawimawh Harry Kane an chelh thei lova, Kane awm loh vangin an tlarhma an hriam tawk lova, an chak zo lo nghal a ni.