Nilai zan khan UEFA Champions League last 16, first leg khelh chhunzawm a ni a. London club lian Chelsea chuan an fehchhuahna mualah tlawmin, German club Borussia Dortmund lakah si khat faiin an tlawm. Thlasik bazar laia sum seng hnem Chelsea hian result tha an nei thei lo chhunzawm zel.
Signal Iduna Park a lenglut Chelsea hian beisei angin an khel tha tawk lova, chawlhlawk hmain goal thun theihna hun nei tha zawk erawh an ni thung. Kai Havertz ball pek tha tak atangin loan-a an hawh mek Joao Felix chuan goal a thun teuh hle a, a pet na leh tha tak chuan cross bar a per tlat thung a, mualneitu Dortmund an him hlauh. Chawlhlawk hma hian goal thun tumin shot nei nual mah se team hnihten shot on target an nei thei lo ve ve thung a, goal awm lovin chawlhlawk an hmang.
Chawlhlawk hnu lamah inkhel a hmuhnawm zui zel a, mualneitu Dort-mund in goal an thun ta nge nge. An khingpuite nawr let thutin Karim Adeyemi chuan tha zetin thui zet mai a khalh a. Enzo Fernandez a paltlang hnuah, Chelsea si nghak Kepa Arrizabalag chiang zetin a bum zui leh a, minute 63-naah Adeyemi hian pui zetin hmahruaina goal a thun.
Goal an chhuah hnuin Chelsea hian goal an thun teuh hle. Freekick an hmuh chu Reece James chuan tha zetin a pet a, Dortmund goalkeeper Kobel chuan pui zetin a lo dang leh tlat thung. Hemi hnu hian defender Koulibaly chuan goal a thun teuh hle a, midfielder Emre Can chuan goal line atanga petchhuakin an team a chhan him zui ve leh bawk. An hun tha an hlah zel vangin Blues hian an si phurh an sut thei lo va, Dortmund lakah si khat faiin an tlawm ta nge nge.
Borussia Dortmund leh Chelsea te hi March ni 7 zan khian Stamford Bridge-ah an inkhel nawn leh ang.
Chelsea an chak lo
