Daily Newspaper

Chelsea an tlawm

6

Inrinni zan khan English Premier League khelh chhunzawm a ni a. Hmahruai theihna hun remchang nei tha tak Chelsea chu Everton lakah an tlawm a, table ler an luah phak lo. Inkhel ngaihven hlawh tak Manchester derby-ah goal lut a awm lova, beisei phak lovin United leh City te an inthathen.

Everton vanneih zan
English Premier League 2020-21 season-ah tha chungchuang taka bul tan, khelh li chhung chak zawn nghal hial Everton chuan tunhnaiah chak an harsat a, hnungtawlh nasa hman tak; Everton chuan Goodison Park-ah tunhnaia khel tha, inelna hrang hranga chak reng mai Chelsea an mikhual. Team lian, nipui bazara sum seng hnem Chelsea lakah tha zeta inlan in, fiahna hautak an paltlang a. Sigurdsson penalty chakpui in, Chelsea kaltluang lai an titawp a, an mualah point thum hlutak an hlawhchhuak. .

Everton lakah hnehna an chang a nih chuan Chelsea hian London-a an elpui Tottenham lehpelin table chung ber an luah thei dawn a. A chung ber luah let leh tumin Goodison Park-ah thapui an chhuah nasa hle. Goal thun ngei tuma tan khawhin, hun tawp dawn hnaiah hlauhawm viau mahse goal erawh an thawkchhuak zo lova, uiawm takin an tlawm ta tho thung.

An muala inkhel entu mipui an kir leh tum hian Everton in Chelsea lakah bul an tan tha viau a, an mualah ngei inringtawk leh mit la takin an inlan. Goal thun tuma an innawr tawn hnuin minute 22-naah si nghak an lak fuh em em, an team chhanhimtu ni fo Edouard Mendy a chesual a, season kal mekah ram leh club tana goal thun thei Dominic Calvert-Lewin lakah foul in penalty a chawi. He penalty hi midfielder Gylfi Sigurdsson chuan a pet goal a, hmahruaina goal a thun.

Goal an chhuah hnuin Chelsea in an khel tha leh zual a, hlauhawm takin an khingpuite an nawr. Reece James pet tha zet, goal ngei tura ngaih ni hman chu Everton si nghak Jordan Pickford chuan pui zetin a dang a, a team a chhanhim hlauh. An si phurh sut ngei tumin thapui an thawh zui zel a. Mason Mount chuan goal thun theihna hun tha a neih chhawr tangkai thei lo vin, goal kham a tih per ve dawp bawk.

Mualneitu Everton pawh an awm mai mai bik lo. Toffees tan hian Richarlison chuan goal theihna hun remchang vawihnih a neih a chhawr tangkai thei lo va, hma an hruai fal thei bik lo. Richarlison bakah hian defender Yerry Mina chuan tauh goal theihna hun tha tum hnih a neih chu a chhawr tangkai thei bik lo bawk. Inkhel hmuhnawm leh inhnehtawk takah goal dang a luh belh thei lova, Everton chuan team lian lakah hnehna pawimawh tak chang in, inrintawkna thar an nei leh ngei tura ngaih a ni.

Everton hneh se Chelsea hi hma hruaitu ni thei tur an ni a. Khualmual ah an tlawm tak si vangin hmahruai theihna hun remchang an hloh ta thung. Pathianni zana inkhel Tottenham leh Leicester City ten hnehna an chang a nih chuan Blues hi an tawlh hnung dawn a, pathum na atangin palinaah an tlathla dawn a ni. Team hnihte hian kar laihawlah inkhel an hmachhawn zui leh nghal dawn a. Everton hian palina luah mektu Leicester City chu nilai zan khian an hmachhawn ang a. Chelsea hian thawhleh zanah 12-na luah mektu Wolves an hmachhawn ve thung ang.

United a him hram
Inrinni zana English Premier League inkhel ngaihven hlawh ber; Manchester derby chu Old Trafford-ah khelh a ni a, ball chang tam leh inkhel thununtu ni zawk chungin mualneitu Manchester United an chak zo lova, an mualah him hlauh in, kum 2016 hnu lamah City laka record an neih that ber hun an tawngbua.

Old Trafford-a inhmachhawn United leh City te hi champions league lamah boruak danglam tak tawng an ni a. Last 16 lut zo lova United an tla a, an mualpho laiin City erawh chu group champion an ni a, phu takin last 16 an lut ve thung. UCL lama an boruak tawn inang lo viau mahse Premier League lamah erawh an chetha lo dun thung. Sawisel hlawh tak United aiin City hi hniam zawkah an awm. United in pariatna an luah a, pakuanaah City an awm ve thung. Premier League-ah Manchester khaw club pahnihin bul an tan chhiat dun ber tum a ni hial awm e.

City hian Riyad Mahrez hmangin goal thun theihna hun tha an nei a, si nghak David de Gea chuan tha zetin a lo dang hlauh thung. United hian ball chang tam mahse hlauhawm an siamchhuak tam thei tlat lo thung. Mual laiah team hnihte an indangchat tawn nasa hle a, goal-ah an hlauhawm tam lo ve ve a ni ber a. Goal awm lovin an inhnehtawk zui ta hial a ni.

United hian City an hmachhawn hnuhnung vawi thumah tlawm an nei lova, hei hi kum 2016 hnu lamah an hmelma City laka tlawm nei lova an kaltluan rei ber tum niin, City lakah hnuhma tha an hnutchhiah thar a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy