Nilai zana English Premier League khelhah Chelsea chuan palinaa awm mek Aston Villa chu an mualah ngei 4-1 in an hneh a, point thum hlu tak an hmu. Chelsea in hnehna an chan laiin Manchester United erawh chu Michael Carrick hnuaia a vawi khat nan Newcastle United lakah an tlawm ve thung. United an tlawm laiin tlakhniam pumpelh tuma tan khawh West Ham United in hnehna an chang ve nawlh thung a, him theih beiseiin hma lam an pan zel.
Pedro-a’n lungthu a kim
Manager thar Liam Rosenior hnuaia hmasawn thar tak Chelsea chuan season kal meka khel tha tluang tak Aston Villa chu Villa Park-ah an luhkhung a, mikhual an nihna hmunah 4-1 ngawtin hnehna an chang. Villa an sawp tum hian Chelsea tan João Pedro chuan goal thum a thun a, lungthu a kim.
Pathumna luahlet thei tura chak mamawh Aston Villa hian an mualah bul an tan viau a, Douglas Luiz chuan inkhel tan atanga minute hnihna lekah hmahruaina goal a thun nghal. Hma takah goal thun bawk mah se Aston Villa in Chelsea an er let an dawl zo lova goal li ngawt an chhuah ta thung.
Chelsea tan hian João Pedro chuan minute 35-naah goal thunin an si phurh a sut a, Pedro hian minute 45’+6-naah hma an hruai letna goal a thun hnuin minute 64-naah an goal lina a thun zui leh bawk a, goal thun lamah lungthu a kim ta chiah a ni.
Chawlhlawk hnu lamah Chelsea an khel tha chhunzawm a, minute 64-naah Pedro-a’n an goal lina a thun bakah Cole Palmer chuan minute 55-naah an goal thumna a thun ve bawk. Chelsea hian 4-1 in an khingpuite an lehthal a, panganaah insawhnghetin, top 4 huang an hnaih deuh deuh zel. Hetihlai hian an mualah an tlawm vangin Aston Villa in pathumna an luah let ta thei lo thung a, top 4 huang luah an tumnaah an dinhmun a him lo deuh deuh zel.
United an tlawm
Manager lailawk Michael Carrick hnuaia khel tha thar tak; pathumna rawn luah phak ta hial Manchester United chu Carrick hnuaia a vawi khat nan a tlawm a, tam zawk ni chungin mikhual an nihna hmunah Newcastle United an hneh lo.
St James Park-ah Newcastle United leh Manchester United te an inhnehtawk viau a, goal pawh an thun mai thei lo. Inkhel hmuhnawm takah goal lut a awm theih loh reng laiin Newcastle United player Jacob Ramsey chu minute 45’+1-naah hnawhchhuah a ni. Tam zawk an nih vangin United an phur viau a, chak leh ngei turah pawh an inngai viau naa goal chhuah hmasa zawkah an tang thung. Newcastle tan Anthony Gordon chuan minute 45’+6-naah penalty pet goal in mahruaiana goal a thun. Hmahruaina goal an thun hnu lakah Magpies pawhin goal an chhuah ve tho bawk a, United tan Casemiro chuan minute 45+9 chuan goal thunin an si phurh a sut a, 1-1 a inhnehtawk chungin chawlhlawk an hmang.
Chawlhlawk hnu lamah inkhel a hmuhnawm zui viau a, tlem zawk ni ngar ngar Newcastle United tan William Osula chuan tha zeta khalh tlangin a khalh tlang a, pui takin goal a thun zui a, minute 90-naah hma an hruai nawn lehna goal a thun a, he goal hi United lakah an chakpui a. An mikhual United lakah hnehna pawimawh tak changin point thum hlu tak an hmu.
Chelsea chak laiin United an tlawm
