Daily Newspaper

Chelsea in Havertz la lut

33

Chhuak hmasa lamah khan Chelsea in Kai Havertz an hnaih thu leh Havertz-a’n Blues zawm fel tura Germany Squad a chhuahsan thute kan tarlang tawh a. Tunah chuan Havertz hi Chelsea player thar niin, an lak luh fel thu kan tarlang thei ta.

Premier League 2019-20-ah palina ni a, champions league khel tur Chelsea hian kum 21 mi Kai Havertz manah £71m an thehchhuak phawt a, a khelh that dan a zirin a man hi belh leh theih turin inremna an ziak tel bawk. Chelsea player manto ber dawttu a ni.

Chelsea player thar Havertz hi police leh dan hre mi fapa a ni in, khawte takte Mariadorf a seilian a ni. An khaw club Alemannia Aachen tantu a ni a, naupante a ni laiin an khaw club ah hian a khel ve lawp lawp thin. Kum 10 mi a nih laiin Bayern Leverkusen scout ten hmu fuhin thiam an ti hle a, an hnena zir turin an la zui ta a ni. Kum 17 mi lek a nih laiin kum 2016 khan Bayern Leverkusen tan a khel tan a, mit la takin a inlan nghal a, khawvela player tha ber pawl ni thei tur khawpa beiseiawmin a inlan nghal. ‘Michael Ballack thar’ ti hialin sawi a ni a, Leverkusen tan hian attacking midfield angin bul a tan a, mamawh dan a zirtin central midfield, right wing leh striker angin chhawr a ni bawk thin. Germany National coach Joachim Low pawhin a dah sang viau a, role pawimawh tak a pe nghe nghe a ni. Ballack nen khaikhin ni bawk mahse Ballack angin thahruai a nei ngah tawk lova, tlarhma leh hnungah tlan zung zung turin a rang zawka ngaih a ni ve thung.

Leverkusen tan hian Bundesliga-ah vawi 118 khel hman in, goal 36 zet a thunsak hman. 2018 atang khan Germany senior team tan a khel tan a, vawi 7 khel tawhin, goal khat a thun tawh. Season liam ta khan Bayer Leverkusen tan a khel tha leh zual a, season tharah khawng taka inlan tur Chelsea chuan manto takin an la lut ta a ni.

Nipui bazarah Blues an talna hle a, player thar pasarih ngawt an la lut tawh. Blues player tharte hi Kai Havertz (£71m), Timo Werner (£47.5m) Ben Chilwell (£45m) Hakim Ziyech (£33.3m) Malang Sarr (Free) Thiago Silva (Free) leh Xavier Mbuyamba (free) te an ni a. Season tharah chuan team hmuhnawm tak an nih ngei a rinawm.

(THE AIZAWL POST – Infiamna)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy