Mizo Writers Association (MWA) buatsaih Lehkhabu Pho Runpui-ah lehkhabu an hralh tha a, cheng nuai 16 man an hralh.
October ni 16 atanga ni 24 thleng khan Vanapa Hall bathlarah Lehkhabu Pho Runpui hi an buatsaih a, Rs 16,63,780 man lehkhabu an hralh a ni. Lehkhabu man tlawmzia ngaihtuahin lehkhabu cheng nuai 16 chuang man hi a tam tham ang tih a chiang.
“Kan lawm khawp mai, kan beisei phak bak a ni, hlawhtling kan inti,”MWA president R Lallianzuala chuan a ti.
“|halaiin an bawh, thalaiin lehkhabu an rawn lei nasa a, chu chu hai rual a ni lo. Sikul exam lai a nih avangin sikul naupang an rawn kal tha lo zawk a. Chuti ni lo se chu sikul naupang hi tun aia tam an rawn kal ang,” a ti bawk.
“Kan beisei aia tam kan hralh a, kan lawm tak tak a ni. Inhralh ve nual chu kan beisei tho a, mahse kan beisei aia tam daih kan hralh,” Lehkhbu Pho Runpui-a lehkhabu zuar pakhat chuan a ti.
Aizawla lehkhabu dawr nei Nutei Book Store te’n Lehkhabu Pho Runpuiah hian dawhkan an hung ve a, anni pawhin an beisei aia an inhralh that thu an sawi. “Ni khatah dawra kan hralh aia tam kan hralh thin a, kan lawm khawp mai,” an ti.
“Lehkhabu hi mi hian an ngaihlu. An ngaihlu tawh lo emaw hi kan ti ringawt a, mahse kan rin aiin an ngaihlu ang. |halai zingah te hian lehkhabu ngaihlu an thahnem. Chung chu Lehkhabu Pho Runpui-ah hian a lang thin niin ka hria,” tiin lehkhabu zuar pakhat dang chuan a sawi.
MWA hian Lehkhabu Pho Runpui hi 2019-ah an buatsaih tan a, mipuiin an ngaihlu deuh deuh nia an hriat thu an sawi.
Writer larte’n an awm thin a, chu chu mipui hiptu pakhat chu a ni ang. He hmuna kalte’n writer-te hi biain an autograph te an dil a, thla an lakpui bawk a, chu tum rana kalte chu an awm thin.
Zirlai a huhova kal an awm thin bawk a, a tiluntu pawh an tling ang. Tin, nu leh pa, an fate hruaia kal an awm thin bawk.
Cheng nuai 16 man lehkhabu hralh
