Site icon The Aizawl Post

CHENG SAWM THIR

By Mahmuaka Chhakchhuak
Ka awmna hmun Ramhlun South Bus stand atang hian Bus-in ka chhuak thin a, Bazar stand thleng hian Cheng Sawm ka pe mai thin a, thla tam kalta atang daih tawh khan Cheng Sawm thir an la duh ta tlat lo mai a, vawikhat phei chu Bus Conductor chuan ‘ka pu, hmun dangah kan hmang thei chuang si lo a’ tiin min pe kir leh ringawt mai a, kei lahin a dang ka nei lo ka ti bawk si a, tichuan min free ta ringawt mai a, nimin phei kha chuan bus chhunga ka kianga ding nula pakhat hian min pek sak ngawt mai bawk a, chibai hial ka duh nain ka zak deuh si a, ka lawm ngawt mai.
Kei ang bawka hetianga harsatna tawk hi in awm ve tho ka ring a, dawr nghaktu pakhat phei chuan ‘sangkhat aia tam ka khawl tawh’ a ti hial mai lehnghal a! Midang harsatna tawh dan ka hre vek lo nain hetianga harsatna kan tawk hi pawi ka ti ngawt mai. Keini angin State dangah pawh harsatna an tawh ka hre bawk si lo! Ka theih ang angin Bank lam ka be kual a, engmah harsatna a awm bawk si lo a, a thleng theih a, a lehkha nen a hlutna a inang reng bawk nen hian eng vanga hetia mipui lam ten harsatna tawk reng mai nge kan nih tak le? Mizote hian hlauh kan ngah lutuk hi a pawi ber chu a ni.
Tunah pawh kan unau thenkhatte phei chuan Addhar Card duh loin UID an hlau em em a, tlem lai phei kha chuan Bawngkawn lamah an inhmuhkhawm hial kha. Ka thianpa pakhat hi a tel ve lehnghal a, Bible behchhan tur hre mang si lo hian tute emaw sawi ringin mi lah chu a hnial thei hrep lehnghal a! A hahthlak hrat lam deuh chu a ni. Ration Card duh lo pawl te pawh kan la awm zel a, hetiang zawnga Pathian thu kan la kawi zel dawn a nih chuan kan hmabak chu a eng har ngawt ang.
Thilmak kan hre thei em em a, vawi engzat tak nge Vantirhkoh inlar pawh kan hmuh tawh hi? Rinna kawnga puitling hmel pu ve tawh hial turte hian Mihlim pakhat thusawi te hi kan buaipui em em a, Bible-a inziak bak hi chu i buaipui tawh lo teh ang u, khawi hmunah pawh Vantirhkoh inlar tiin lo sawi mahsela i tlan dul dul tawh lo teh ang u. Kan Kristian percent lah a tlem zawnga a than zel zawk hi! Literacy rate-ah lah kan hnungtawlh a, AIDS vei tam lamah kan thang chak thung daih nen. Tunah phei chuan India ram pum huap pawhin HIV vei tam ber State kan ni leh zel bawk a!
Hawh teh u, hetiang Cheng sawm thir mai maiah hi chuan mahni leh mahni chu harsatna insiam tawh lo ila, kan unaute chungah pawh harsatna thlen chuang loin pangngai takin i hmang tawh zawk ang u. Kan cheng sawm thir hi India pawisa ngei a ni a, mi rethei leh hausa karah pawh a danglam lo a, dawr lian leh dawr têah pawh a hlutna a ngai reng a, lawilo dawrah pawh a hlutna a tlahniam bik chuang lo.
Thawhlawm bawma thlak atan pawh a iaiawm chuang loh a, WAI WAI bawm khat leina atan pawh i la hmang zel ang u. Bus fare atan pawh a iaiawm loh a nia. Ka Cheng Sawm Thir hi i Cheng Sawm lehkha nen khan a hlut lam a inang reng a, a thiltih theihna pawh a danglam chuang lo e. I Cheng Sawm lehkha ai khan a la tlo zawk lehnghal.

Exit mobile version