Darkar 61, minute thum leh second 34 zet chess an khelh hnuah Norwegian Askild Bryn leh CM Odin Blikra Vea te chuan Longest Chess Marathon, Guinness World Record an siam ta. An chess khal lai hi an inkhel chet dan zawng zawng Chess.com ah live stream vek a ni.
Guinness World Records Official Adjudicator, Carl Saville chuan Askild leh Odin te inkhel chu record siam tura inpuahchah tha ber pawl ni a a hriat thut sawiin, “Kum 15 chhung he hna ka lo thawh ve tawhah hian a inbuatsaih tha ber pawl an la niin ka hria. Ka lawmpui takzet a ni,” a ti.
Chess.com-in an kawmnaa record siam teih loh mai inrin chang an nei em tia an zawhna changin Blikra chuan, “Theih loh inrinna chu kan nei vak lo, mahse, a tum chu kan tum lui ve nasa e. Ka phurna kha min nawr kaltu ber a ni a, thil awlsam tak chu a ni lo chiang khawp mai,” a ti.
Thawk khat lai phei chuan Blikra hi a mit vaiin, a khaw hmuh te a chiang lo a, thil te a hmusual deuh lek lek a, an chess board chu a vir niin a hria a, a thle kual vak vak hman nghe nghe a ni.
Bryn chuan, “Odin hian, ‘Duhtawk tawh mai, ka peih tawh lo,’ a ti dawn lo tih ka hrechiang a. Ani pawhin chutiang tur tho chuan min hrechiang ve bawk a. Chu chuan a darkar hmasaber atanga a tawp thlengin min pui a ni,” a ti.
Guinness inkaihhruainaah darkar khat an khelhah minute 5 zel chawlh an nei thei a, darkar ruk chhunga an chawlh neih belhkhawm, minute 30 an khawl thei bawk. He an chawlh neih reilote chhung hi han mutthluk zuai nan an hmang thin a ni.
Record siam tuma an inkhelh chhung hian Chess World Champion Magnus Carlsen pawhin an inkhelhna hmunah a tlawh fo a, record an siam pawhin a chibai hmasatute zingah a tel a, “Ka chhuang takzet che u a ni, i puitlin thei lo mai ang tih te ka lo hlauthawng hman a nia,” a ti.
Darkar 61 chess an khelh chhung hian game 383 an khel hman a, a game hnuhnung ber hi 52-move-ah draw-in accuracy level 71.9 leh 70.1 in an tawp ta a ni. Darkar 61 chhung chawl lova khelah chuan a chhe lo khawp mai.
A hmaa hetiang record pawh Norwegian FM Sjur Ferkingstad leh Hallvard Haug Flatebo te siam a ni a, anni thian dun hi 2018 khan Haugesund, Norway-ah darkar 58 leh minute 9 an inkhel ve thung a, an record hi Nigerian chess player Tunde Onakoya chuan New Yprk-ah kumin April khan darkar 60 chess khelin a rawn khum ve leh a, mahse, Tunde record hi Guinness World Record-in official-a an puan hmain Bryn leh Blikra ten record thar an rawn siam leh ta a ni.
Chess khel rei record siam
