Chhattisgarh-a Bijapur district-a venhim hna thawktute nen an inbeihnaah Maoist 17 vel thah an ni tih Ningani zan khan police hotuin a sawi.
Inkahna hi Ningani zing dar 9:00 vel atanga Bijapur chhim lam ram ngawa venhim hna thawktu pawl hrang hrang tanghoten Maoist laka beihpui an thlaknaah a ni a, tlai thim thlengin an inkap tih a sawi.
Maoist beitu zingah hian state police hnuaia district pathuma District Reserve Guard (DRG), CRPF hnuaia ramhnuaia chetla tur bika duan CoBRA (Commando Battalion for Resolute Action) battalian nga leh 229th battalion CRPF an tel.
“Thu kan dawn tawh chinah chuan Naxalite 17 thah an ni a, chanchin kimchang ngaihchan mek a ni a, beihpui thlak chhunzawm zel a la ni bawk,” tiin police hotu chuan a sawi.
Venhim hna thawktute lamah hian thi leh hliam an awm hriat a ni lo.
Tun tuma mite nen hian state chhung hmun hrang hrangah tun thla chhungin Maoist 26 thah an ni tawh.
January 12 khan hmeichhe pahnih telin Maoist panga chu Madded police station huam chhung, Bijapur district-ah tho venhim hna thawktuten an that tawh bawk.
Nikum chhung khan hmun hrang hranga beihpui thlaknaah Maoist hi 219 thah anga chhinchhiah a ni.
Chhattisgarh-ah Maoist 17 that leh
