Chhe lailet dera inchhuah hi a tha ber lo – Chief minister

Chhe lailet der leh beidawn thlak taka kan society chhuah thin chu a tha ber lo tih chief minister Zoramthanga chuan a sawi.
YMA Khatla South branch chuan Thawhtanni khan an kum 25-na tlin, Silver Jubilee an lawm a, he hun hmanpuitu chief minister chuan ram hmasawnna’n a chhunga cheng mipui an pawimawh tih a sawi a. Kan society chu chhe lailet der leh beidawn thlak taka chhuah a tha ber lo tih sawiin, “Kan thatna leh chakna, midang tana entawntlak keimahnia awmte hmang hian hma kan sawm thei. Mizoram din tha turin kan rama awmsa, theihna awmte ngaihtuah ila, hman tangkai theih ram zau tak, a chhunga chengte chawmzo tham, sik leh sa nuam tak, ruah tui duhthusam, thei leh thlai hrang hrang that duhna ram kan nei tih ngaihtuahin, a chhunga chengte hian kan ram malsawmna kan haichhuak thei a. Chu’nga theihna hmang tangkai tur chuan a ram luahtute kan pawimwh ber,” a ti.
Mizo khawtlang nunah YMA-in hna tangkai tak tak a lo thawh tawh thin thu leh khawtlang nun siamthatna atan a pawimawh thu Zoramthanga hian a sawi a. Khawtlang nun inrelbawlnaa YMA leh tlawmngai pawl dang – kum upa atanga naupang ber huam kim vek pawl hrang hrang hlawmkhawm tha tak tak kan nei chu Mizote vanneihna a nih thu a sawi a ni.
Aizawl West-III bialtu MLA VL Zaithanzama pawhin thu sawiin, khawtlang nuna YMA thawhhlawk zia, ruihhlo leh chin thalo avanga enkawl ngaite buaipui kawnga an thawhhlawk zia a sawi a. Chutih rualin khawltang nun runa harsatna hrang hrang awmte siamtha a, hmalam pan a tul thu a sawi a ni.