Chhetri hoa Asian Games khel tur India
Veteran striker Sunil Chhetri chu tunthla tawp lama Hangzhou Asian Games football inelnaa India player langsar kan hmuh chhun a ni dawn.
September ni 21 khian Indian top flight Indian Super League season 10-na an tan dawn a, chumi hma lawk chuan China ram khawpui pakhat Hangzhou-ah Asian Games football competition an tan dawn a, hei vang hian ISL club engngemaw-zatin Indian squad member 22 tar-chhuah tawha hming lang an player-te chhuahtir an remti lo hlawm a, All India Football Federation (AIFF) pawhin Asian Games-ah India team tha ber tir thei loin player 17 chauh awmna team nem zawk a tir dawn a, Chhetri hi India player pawimawh leh langsar kan hmuh awmchhun tur a ni!
ISL club-te khawsak dan hi India head coach Igor Stimac pawhin na takin a lo sawisel tawh a, team khawng ber pawh an tirh theih dawn tak loh avangin AIFF president leh BJP hruaitu ni bawk Kalyan Chaubey hmai a uang lo hle tura ngaih a ni!
Hun engngemawchen an innawr hnuah AIFF chuan a tira squad member 22 an thlanchhuah tawh atangin player pakua an chang thei hram a, midang tawnhriat nei tlem zawk pasarih nen player 17 awmna under-strength team a puang thei thei ta chauh a, a hmaa India hmachhawp atana Asian Games lo ngaipawimawhtu Stimac chuan duhthusam tling lo zet team hruaiin Hangzhou a pan a ngai dawn!
Tournament lian (major compe-tition)-ah India hian a team neih khawng ber a tir tlangpui thin a, tuntum erawh team tha ber dawttu a tirchhuah a ngai dawn a, tunhnaia pa ni thar leh Indian football poster boy ni mek bawk Chhetri phei chu tel lo se Stimac tan a tuiawm loh zual ngawtin a rinawm!
An duh ang player khawm kim thei lo mah se national federation chuan player an chhuahtir avangin Indian Super League club-te leh FSDL chungah lawmthu a sawi zui ta tho.
Indian team hian September ni 19 mai hian Asian Games campaign bul an tanna match-ah a thlengtu China an hmachhawn dawn a, Bangladesh (September ni 21) leh Myanmar (September ni 24) an tum zui leh ang.
Asian Games football khel tur team-te hi group paruka then niin, group tina point hmu sang team pahnih leh pathumna team tha zual palite’n pre-quarterfinal an lut ang.
Asian Games hi Paris Olympics 2024 khel tur zawnna a ni nghal a, hei vang hian ISL club-te chu national duty tura Indian player an kawlte theh-chhuak turin an nawr na hle a, chutih laiin Asian Games hi Fifa lamin loh theih loha club-te’n ram tana khel tura an player kawlte an chhuahtir ngei ngei-na tur (international match windows)-a a rinluh tel loh avangin AIFF ngenna an tihlawhtling tha duh ta lo a, season liamtaa India player langsar Lallian-zuala Chhangte bakah defender pawi-mawh Sandesh Jhingan leh number one goalkeeper Gurpreet Singh Sandhu hmuh tur an awm ve ta lo a ni.
Dan pangngai ang chuan senior men’s team hi player 22 an ni thin a, AIFF lamin a duhkhawp player a hmuh theih loh avangin player 17 awmna team-in China an pan dawn a, he under-strength team-ah hian goalkeeper pahnih chiah an awm a, hun dangah chuan pathum dah thin an ni a, Asian Games-ah hian tournament laia inhliam a rem lo zual hle dawn a ni.
A tira player 22 hming tarchhuahah khan Bengaluru FC atangin player paruk lai lang mah se South Indian club hian Chhetri chiah an chhuahtir phal avangin India goal-veng hlun Gurpeet pawhin China a pan thei dawn ta lo a, Indian goal-ah Gurmeet Singh emaw Meitei Dheeraj Singh Moirangthem emaw an din mai a ngai dawn.
Squad hmasaah East Bengal atangin player pahnih lang mah se an pahnih hian Kolkata giants-in an chhuah phal ta lo a, final team-ah Bengal player hmuh tur an awm ve ta lo a ni.
Mumbai City FC leh Mohun Bagan chuan player pakhat ve ve Gurkirat Singh leh Sumit Rathi an thehchhuak hram thung.
Hangzhou Asian Games khel tura thlanchhuah final team player tam zawk hi an inziahluhna ISL club lama khelhna hmun chang pha mang lo leh regular first XI player ni lote an ni a, India beiseina a sang rih lo phawt!
Asia khawmualpui huap inelna Indonesia 2018-ah khan India hian football team a tir lo a, Incheon 2014-ah khan group stage paltlang zo loin a tla a, he competition-a India thlen-sanber chu Guangzhou 2010 kha niin, pre-quarter an thleng hram a, chu-tiang sulhnu chhe tak hnuaiah team tha ber dawttu nen phei chuan Hangzhou 2023-ah hian ram ropui an thlen zawh a rinawm lo!
Indian squad
Gurmeet Singh, Dheeraj Singh Moirangthem, Sumit Rathi, Narender Gahlot, Amarjit Singh Kiyam, Samuel James, Rahul KP, Abdul Rabeeh Anjukandan, Ayush Dev Chhetri, Bryce Miranda, Azfar Noorani, Rahim Ali, Vincy Bareto, Sunil Chhetri, Rohit Danu, Gurkirat Singh, Aniket Jadhav.