Disaster Management & Rehabilitation minister Prof Lalnilawma chuan Mizorama khuarel chhiatna leh chhiatna dang thleng avanga harsatna sutkian dan tur leh chhawmdawlna awm thei dapin New Delhi-ah sawrkar laipui hotute a dawr a. DM&R secretary Sushil Singh chuan a tawiawm.
African Swine Fever (ASF) avanga Mizorama vawk vulhtute harsatna thlenin, ASF chu State Disaster Relief Fund hnuaia ‘notified disaster’ a puan nise tih chu State Disaster Management Authority chuan a lo pawmpui tawh a; National Disaster Management Authority-ah pawh rawtna thehluh a ni tawh tih a sawi. ASF vang hian vawk vulhtuten cheng vaibelchhe 485.37 an chan nia thlenin, zangnadawmna sang zawk an dawn theih dan a ngensak.
Rawtna thehluh tawh minister-in a umzui zingah hian, Lawngtlai Bazar Veng leh Chandmary-a leimin vanga chhiatna thleng chungchanga Central Special Assistance cheng vaibelchhe 21 dilna; Aizawl, Lunglei, Serchhip, Champhai leh Siaha district tan National Earthquake Risk Mitigation Programme Phase-I ah cheng vbch. 95.76 dilna; National Landslide Risk Mitigation Programme Phase-I hnuaia Ngaizel, Serchhip, Champhai leh Siaha-a leimin thin venna atan cheng vbch. 50 final project proposal report a tel a ni.
Post Disaster Needs Assessment Report 2021–2025 chu Home Affairs ministry hnenah DM&R minister hian a thehlut bawk a. He report-ah hian kum 2021– 2025 chhunga Mizorama chhiatna hrang hrang thleng – Cyclone Remal, ruahsur nasa avanga tuilian leh leimin, Mautam avanga sazu puangin buh leh bal nasa taka a tihchhiat leh ASF avanga harsatna thlengin mi tam tak eizawnna a tihchhiat dan leh inkalpawhna kawngpui engemawzat siam that ngai a awm tih thlen a ni.
Heng thilin a tihchhiat hlutna hi cheng vbch. 644.71 hu vel nia chhut a ni tih pawh thlenin, economic loss belhkhawm hi cheng vbch. 645.49 vel niin, a pumpuia zangnadawmna leh siamthat hna thawhna atan mamawh chu cheng vbch. 873.22 a ni tih sawi a ni.
Chhiatna thlengah cheng vbch. 873 dil
