August 19 chhun khan Maubawk Veng Aizawlah nutling kum 80 mi chu ama inah thah a ni a, police-in rinhlelh thilah mi pathum an la a, he chanchin buatsaih lai hi chuan pawikhawihtu tak hriat a la ni lo.
Thawhlehni chawhnu dar 12.30 vel khan Runliani (80) m/o Zoramliana, Maubawk Kawn Veng chu an chenna inah thia hmuh a ni a. A hliam enin mi kut tuar ngei a ni tih hriat theih a ni. Anmahni hi an ina dawr siam an ni a, thil lei tum mi pakhatin a hmu a, khawtlang inpunkhawmin, police hriattir zui an ni.
Pawikhawihtu hian puanin a lo khuh a, Aizawl SP Rex Zarzoliana Vanchhawng hoin police leh forensic mithiamten hnu chhuina atana hriat theih tur hrang hrang la in a, pawikhawihna thlenna hmun hi an thutchilh nghal a ni.
An in chhehvelah hian CCTV a awm loh avangin hnu chhui a ti harsa deuh a, tunhnaia Runliani pawisa lo laksaktu chu rinhlelh kai niin, Thawhlehnia a thiam kawm mi pathum nen police hian thu zawhfiah turin an la a ni.
Chhunah a inah nutling thah a ni
