Daily Newspaper

Chhung tinin buh phur 42 zel thar

14

Sawhthing an nei a, hmarchapui leh chawhmeh chi dang pawh an nei. Khaw dangah thlai chi hrang hrang an hralh thin. Buh pawh an nei a, kuminah chhung tinin phur 42 vel an thar theuh ang a ni.

Chhungkaw 224 awmna Maite khua chuan kuminah buh phur 9449 an thar a, phur 100 chuang thar pawh chhungkaw 19 an awm. Chawhrualin chhung tinin phur 42.1 zel an thar ang a ni.

Buh phur khat hi tin thum anga ngaih a ni a, a tin zawnga chhut chuan kumina an buh thar hi tin 28,347 a ni.

Maite khua hian Tuivawl kamah leilet an nei a, leilet leh tlangram lo hi buh leh bal an tharna a ni. An kahw YMA hruaitute chuan chhungkaw 70 velin leilet an nei tih an sawi a, leilet nei chhungkaw thenkhat chuan lo an nei tel bawk tih an sawi.

Tlangram lovah chuan buh karah vaihmarcha an ching thin a, vaihmarcha pawh hi an ngah. Sawhthing an ngah a, hmarchapui pawh an ngah. Fur chawhmeh an nei tha a, Aizawlah te, Serchhip-ah te an hralh thin.

Buh hi kum dangah pawh an nei tlem lo a, 1993 velah te phei kha chuan phur 600 thar tling te pawh an awm. Sumchang thlai an uar tak avangin buh hi a hma angin an ngah ta lo zawk a, chuti chungin kuminah chhungkaw 224 awmna khuain phur 9449 an la thar thei.

Maite branch YMA president Vanlalhriata Pautu chuan kumina an thar zat ang vel hi tun hnai kum liam taah pawh an thar tho tih a sawi a, chutih rual chuan buhah hian intodelh chu an inti ngam lo tih a sawi. Buh hi suma chantir a ngai thin a, an hralh thin avangin, ration buhfai an mamawh tho tih a sawi.

“Sumchang thlai kan uar telh telh a, hei vang hian buh hi tun hma deuh angin kan ngah ta lo a. Chutih rual chuan kan buh thar hi hralh te a ngai ve a, vaibuh chu kan mamawh tho,” Hriata chuan a ti.

YMA-in an chhinchhiah danin, kumin hian buh phur 100 thar tling chhungkaw 19 an awm a, phur 50-99 thar hi chhungkaw 61, phur 50 thar tling lo chhungkaw 102 an awm.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy