Chhungkaw tana chhenfakawm
tur ruihhlo vangin enkawl an ngai
– R Lalngheta
Nula tlangval chhungkaw tana chhenfakawm tak tak turte chu ruihhlo vangin enkawl ngai an ni ta zawk chu a pawi hle tih Central YMA president R Lalngheta chuan a sawi a. Chhanchhuah har tak ni mah se, chhanchhuah tam tak an awm mek zel a, tha thlah a rem lo tih a sawi.
Zawlbuk Group YMA tawp zan a hmanpuinaah Central YMA president chuan, ruihhloin a tih buai tam tak an awm a, tam tak thlanmualah an liam mek tih a sawi a. Hengte chhanchhuak tur hian hruaitute kuta dah mai loin, kan zavaia tanrual a ngai tih a sawi. “Ruihhlo avanga hnam ral ta an awm a, chutiang kan nih lohna turin pheikhai rual taka tan a ngai. Ruihlo ngaite hi chhanchhuah an ngai a. Chhanchhuah an har em em laiin, chhanchhuah tam tak an awm mek a, chuvangin tha kan thlah mai a rem lo,” a ti.
Aizawl khawpuiah ruihhlo ngai khawlaia vak mai mai, thilruk tur zawng chu Home-ah Central YMA-in a dah a, doctor thiamten an enkawl tih sawiin, “Nula tlangval tha tak tak, chhungkaw tana chhenfakawm tak turte ruihhlo vanga enkawl ngai an ni ta hi a pawi em em a, hengho chhanchhuak tur hian tanrual a ngai. Ruihhloin a tihbuai, mahni in lumah pawh haw ngai lo, khawlaia tal mai maite tan hian chawngheiin vawi khat tal kan tawngtai tawh em,” tiin, R Lalngheta hian chona a siam a ni.
Tunlaiah high school kal lai atangin ganja zuk ching an awm a, fimkhur a ngai tih a sawi. Ruihhlo ti te chhanchhuah an har tawh avangin a la ti lo ven chu tih nasat a ngai tih a sawi a. Ruihlo zuarte kan dim loh a ngai, tiin, “Kan zah dek dek tur a ni lo. Kan thalaite suattu an ni. Indona a ni a, kan tlawm mai tur a ni lo,” a ti.
Chhungkaw tana chhenfakawm tur ruihhlo vangin enkawl an ngai – R Lalngheta
