Site icon The Aizawl Post

Chiahpuam sum la hmang lo

Kum 10 chuang liam taah khan Mizoramah ‘chiahpuam’ a lo chhuak a, mi engemaw zatin sum dah pun nan an hmang. Mahse rei lo teah a puak a, police-in sum engemaw zat an man. Chung chu bank-ah a la awm a, hman a la ni lo.
Home minister Lalchamliana’n Serchhip bialtu Lalduhoma zawhna, ziaka chhan chi chhanga House a hrilh danin, chiahpuam sum hmuh let hi Rs 730,51,853 a ni a, depositor hnena pek let a la awm lo.
Home minister chhannaa a lan danin, a vai hian Stat Bank of India, Aizawl Branch-ah dah a ni a, a pung (interest) chu Rs 10,83,25,772 a ni.
Aizawl bawrhsap office-a Addl DC (Establishment) leh SDO (Sadar) te hmingin chiahpuam pawisa hi bank-ah hian dah a ni.
Bank-ah dah a ni a, depositor-te hnena pek kir a la awm loh bakah, thil dangah pawh hman a ni lo tih chu home minister sawi dan a ni.
‘Engtia tih nge sorkar hian a tum?” tia zawhna chu, “Court thu kal lai a ni a, judgement order nghah mek a ni,” tiin home minister hian a chhang.
Chiahpuam hi 2008 velah a vanglai a thleng a, collector hnena pawisa dahin kar hnih khat lekah pawh a let fea a pun theih avangin a thang duang hle. Mahse sum pun dan leh a kalna hi hriat a ni tak tak lo a, a bultumtu pawh hriat a ni lo.
Chuti chung chuan mi engemaw zatin pawisa an dah a, sum hmuh nana hmang an tam bakah hna bera neih pawh an awm hman. A puak keh ta thut a, a keh hlimah chuan tharum thawhna a thleng ang tih hlauhawm khawp a ni; chiahpuam-a sum dahtute’n an sum hmuh let leh an duh a, police station velah te, collector-te in velah te an kalkhawm a, thil duhawm lo lian tham thleng lovin boruak a dai zui ta a ni.

Exit mobile version