Daily Newspaper

Chile President thar tur kum 35 mi lek

32

Leftist candidate Gabriel Boric chuan a tumpui ber Jose Antonio Kast chu hnehin Chile President atana thlantlin a ni.

Kast hian a chak loh thu pawm tawhin vote tla chhiar zawh vek tepah Boric hian 56% hmuin Kast hian 44% a hmu a ni.

Tun Chile inthlan hi a danglam hle a, anti-government protest nasa tak neih hnu lawka neih niin candidate pahnihte hian ngaihdan inang lo tak neiin political party-a inhmang lo ve ve leh sorkara la tel ngai lo ve ve an ni bawk.

Kum 35 chauha upa Boric chu khawvela political leader naupang ber te zingah tel dawnin Chile history a president naupang ber a ni bawk.

President kalchhuak tur Sebastian Pinera nena phone-a an inbiakna mipui hriata phochhuahah Boric chuan harsatna tam tak hmachhawn tura a theihtawp a chhuah tur thu a sawi.

Boric hi student protest leader a ni thin a, kum 2019 leh 2020 a intluktlan lohna leh eirukna nasa lutuk duh lova Chile a lungawi lohna lantira sulsutu ber zingah a tel a ni.

Latin America-a economy ngelnghet ber ni thin Chile chu tunah income gap san berna zingah tel tawhin mipui 1% lekte chuan an ram hausakna 25% lai an nei niin United Nations chuan a tarlang.

Boric chuan he intluktlan lohna nasa lutuk hi siamthat intiamin Chile pension leh healthcare system-te chu siamthat a, hnathawh chhung karkhata darkar 45 chu 40-ah tihhniama green investment kalpui a intiam bawk.

A elpui ber Kast erawhin law and order siamthat a, tax lakhniama social spending tihsan a zuar ve thung.

Kast chuan Boric chu hnehna nasa tak a chan avanga a lawmpui thu sawiin, “Vawiin atang chuan President of Chile atana thlan a ni tawh a, zah a phu a, thawhpui kan tum a ni” tiin a sawi bawk.

President kalchhuak tur Pinera chuan Chile chuan harsatna nasa tak a tawh mek thu sawiin president thar tur chu ‘Chilean tinte tana president’ ni turin a ngen a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy