China-ah Indian thlawhna a tum leh ta
India leh China chuan hmun dang kaltlang lova inthlawhpawh (direct flight) chu an inkar an tihthar mek zel karah an chhunzawm leh tan ta.
Kolkata atanga thlawk chhuak, IndiGo flight 6E 1703 chu Thawhtanni tuk khan Chinese chhim lam khawpui, Guangzhou-ah a tum a, mi 180 chuang a phur.
Ram pahnih inkara thlawhna thlawk hi Covid hripui len tan tirh, kum 2020 kum tir lam khan tihtawp a ni a, a hnua Himalaya tlangdunga ramria an intihbuai zui avangin thlawhtir leh a awm zui miah lo.
Tun hnaiah inthenawm ram hnih hian an inkar tha lo hi an siam tha hret hret a, nikum khan ramri-a sipai duty kalpui dan turah pawh inremna an siam.
Indian Prime Minister Narendra Modi-a pawhin kum sarih chhunga a vawi khat nan China a tlawh a. Hemi thla vek hian Chinese Foreign Minister Wang Yi-a’n India a tlawh bawk.
Indian sorkar chuan ram hnih inkara thlawhna thlawhtir leh chu ‘mipui ve ve inpawhna tur’ tia sawiin ‘zawi zawiin ram hnih inkar a tipangngai zui dawn’ tih a sawi.
India hian Chinese khualzinte visa a pek duh lo reng pawh a pe chhuak leh tan ta bawk.
Pathianni zan khan Kolkata thlawhna tumhmunah chuan airline-a thawktute chuan IndiGo thlawhna chuang turte an luh laiin China an thlawk leh tawh tur lawm nan brass oil lamp an chhi.
Chinese consule hotu lian, Qin Yong-a chuan tumhmunah hian ‘India-China inkungkaihnaa ni chhinchhiah bik tak’ a nih thu a sawi bawk.
China atang hian China Eastern Airlines chuan Shanghai leh Delhi inkarah November atang hian thlawhna a thlawhtir ve tan dawn bawk.
China-ah Indian thlawhna a tum leh ta
