China chuan Arunachal Pradesh-a hmun hming hrang hrang 30 a phuah thar tarlanna a nei leh ta a, tun hnaiah Beijing chuan Arunachal Pradesh a ram anga a chhalna chu a hauh na sawt talh talh hle.
India chuan China in Arunachal Pradesh a hmun hmingte an hming a phuah chu hnawl rengin a ram chhung a ni a, a ram chhunga hmun hming te phuah ve ringawt chuan engmah awmzia a nei lo tiin a sawi.
Chinese Ministry of Civil Affairs chuan thuchhuah a siamah Zangnan a geographical name te siam danglam a ni a ti a, Zangnan tih hi Chinese tena Arunachal Pradesh an sawina niin Beijing chuan South Tibet huam chhunga a ngaih a ni.
Ministry official website chuan hming phuah thar 30 te hi a pholang a. May 1 atanga hman tan tur niin Chinese Civil Affairs Ministry chuan kum 2017 khan Zangnana hmun hming paruk phuah thar a kalpui hmasa ber a, kum 2021 khan hmun 15 dang te hming phuah thar list a tichhuak leh a, kum 2023 khan hmun 11 hming a tichhuak leh a ni.
Tun hnai lawkah pawh Prime Minister Narendra Modi an Arunachal Pradesh a 13,000 feet a sanga Sela Tunnel hawnna a neih avangin Beijing chuan India hnenah lungawilohna a thlen a ni.
Sela Tunnel hian pawimawh thuk tak neiin fur leh thal lai leh thlasik hunah pawh Tawang chu harsatna awm hauh lovin tlawh pawh theih rengin a siam dawn a, sipai te chetvelna pawh nasa takin a tiawlsam dawn a ni.
Chinese Foreign leh Defence Ministry te chuan Arunachal Pradesh chu China ram huam chhung a nihzia an sawi chamchi reng a. March 23 khan External Affairs Minister S. Jaishankar chuan China-in Arunachal Pradesh a ram anga a chhal fo chu ‘awm-ang-lo’ tia sawiin ‘India ram bung dik tak a ni’ tiin a sawi a.
“Thil thar a ni lo. China hian a ram angin a chhal a, a chhal lian zual zel a ni. A ram anga a chhal ngawt hi a awm ang lo va, tun thlengin a la atthlak zui zel” tiin Institute of South Asian Studies (ISAS) of the National University of Singapore (NUS) a lecture a peknaa zawhna a chhang a.
“He thilah hian kan dinna a chiang a, ramri chungchang sawihona kan neih hunah pawh kan sawi tel tur a ni ang,” tiin a sawi bawk.
Beijing chuan US in thuchhuah siama Arunachal Pradesh chu Indian territory a ni a tih pawh a sawisel na hle bawk. State Department Principal Deputy Spokesperson Vedant Patel chuan March 9 khan “US chuan Arunachal Pradesh chu Indian territory ah a pawm a, Line of Actual Control pela military emaw civilian ten emaw ramri zauh tuma chetlakna te kan duh lo takzet a ni” tiin a sawi a ni.
Chinese Foreign leh Defence ministry te ve ve chuan US thuchhuah siam chu sawisel nghalin China-India boundary issue chu ram pahnih inkara chinfel tur a nia, Washington inrawlhna tur a awm lo an ti ve thung.
Tuna Chinese civil affairs ministry in hming a tarlan chungchangah foreign language emaw minority langauge a hming te lehlin a nih dawn chuan State Council in standard a siam mila kalpui tur a ti bawk a.
Hming lehlin a nih dawnin mipui hriatah national database for geographical names chuan pholangin chumi hnuah official publication siam niin kalpui a ni chauh thin tiin Global Times chuan a tarlang bawk a.
State Council chuan April 2022 khan hmun hming te ennawn leh phuah thar a kalpui tan a ni a ti bawk.
China-in Arunachal hmun hming phuah
![](https://theaizawlpost.org/wp-content/uploads/Clipboard01-462.jpg)