Daily Newspaper

China-in eibang nawi tihtlem nan hmalakna kalpui

14

China chuan food waste (ei bang nawi) tih tlem a nih theih nan hmalakna a kalpui a, hei hi President Xi Jinping an eibang nawi tam lutuk chu ‘rapthlak leh hrehawm’ tia a sawi vang a ni.

President Zi an Covid-19 chuan food waste lamah fimkhurna a siam a ni tia a sawi hnuah ‘Clean Plate Campaign’ kalpui a ni nghal a ni.

Xi Jinping chuan China chuan ‘food security rilruah a dah reng tur a ni’ tiin a sawi a.

Tun hnaiah China chhimlam chu tuilian nasa takin nuaiin thlai leh buhchinna zau tak tak te a tichhia a ni.

Chinese state news agency Global Times chuan China-in food crisis a hmachhawn dawn a, epeidemic in a ti nasa zual dawn nia sawi chu a hnawl thung.

State TV chuan livestreamers te chaw leh chawhmeh hniang hnar tawka tam tak tak eia inphochhuak te a sawisel bawk a.

Xi Jinping-a’n sawi a neih hnuah Wuhan Catering Industry Association te chuan khawpui chunga restaurant-te chu thil ei thin te hnena chawhmeh an pek thin titlem turin a ti zui nghal a. Group anga restaurant-a thil ei te chuan thil ei zat aia pakhata tlem chawhmeh an order thei dawn chauh a ni.

He system hi ‘N-1’ tih niin thian rual 10 chuan chawhmeh 9 an order thei tihna a ni.

Mahse, system thar hi a taka kalpui nghet tur chuan hun a la mamawh dawna ngaih a ni thung a, China-ah chuan ei zawh sen loh order chu polite naa ngaih a nih vang a ni.

Group anga chaw ei khawmin plate ruak a awm chuan chaw eikhawm huaihawttu chu tha lo taka ngaih a ni a, a mi sawm te tana hnianghnara eitur pawh chhawp chhuak thei lova ngaih a ni.

Mahse, N-1 idea hian online-ah sawiselna tawk thungin, ‘a khauh lutuk’ an ti ve thung a. “Mi pakhat restaurant-ah kal ta se, chawhmeh engzah nge a order theih ang? pakhatmah,” tia sawi an awm bawk.

Mi thenkhatte chuan restaurant dinner tam ber te chuan chawhmeh chuangtlai an order ngai lo ti thungin, officials tena dinner puitham taka an huaihawt leh siamah chuangbang a tam theih lutuk zawk vang a ni an ti thung.

China State agency CCTV chuan livestreamers te tum khata chaw leh chawhmeh inchhawpa ei teuh teuh thin ‘Mukbang’ tia hriat lar Asia leh China hmun hrang hranga lar em em te chu a sawisel bawk.

Tun hi China-in anti-food waste campaign a kalpui tumkhatna a ni lo va. Kum 2013 pawh khan ‘Operation Empty Plate’ campaign lo kalpui tawhin officials tena ruai ropui tak tak an theh thin te chu a lo thlurbing tawh a ni.

Hetihlai hian WWF China chuan kum 2015 chhung khan China chuan eitur chuangbang paih leh mai 17 atanga 18 million tonnes vel a nei niin a lo sawi tawh bawk.

China-in eitur a paih te hi a tam tham hle a, mihring 1.4 billion te eibang nawi hian kum khatah mi 30 atanga 50 million a chawm thei anga ngaih a ni.

Kum 2019 July thla khan Shanghai khawpui chuan mimal leh company te lakah food waste chungchangah khauh taka dan kalpuiin an food waste te chu recycle tura tih an ni a, a zawm duhlote lakah hremna na tak kalpui niin sawisel a hlawh chungin tunah chuan China khawpui dangah pawh kalpui a ni tawh zawk.

China-ah hian thau uchuak pung zel bawkin kum 2016 khan khawvelah thau uchuak ngah lamah US khumin pakhatna a lo ni tawh bawk a ni.

(THE AIZAWL POST – Rampawn)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy