China-in foreign minister Qin Gang thlak

China chuan foreign minister Qin Gang chu ruat atanga thlasarih hnu lekah a ban leh nghal zui a.
Qin hi President Xi Jinping thuihhruai rinrawl pakhata ngaih a ni a. Tunah erawh Communist Party foreign affairs chief Wang Yi an a thlak a ni.
Qin hi tun hnaiah mipui nawlpui hriatah inlan tawh miah lovin a chungchangah official te an ngawih reng bawk si avangin ngaihthatlohna a lian hle a.
Kum 57-a upa Qin hi mipui hmaa a inlan hnuhnun ber chu 25 June kha niin eng vanga a nihna hlihsak nge a nih sawichianna engmah a awm lo bawk.
Nikum December thla lawk khan a dinhmun chelh tir a ni a. Thla kalta lawk pawh khan US Secretary of State Antony Blinken nen Beijing an ram pahnih tena inzawmna tha an neih theih nana inbiakna la nei an ni bawk.
A hna atanga ban a nihna chuan zawhna tam tak a thlen nghal a. “China top legislature te chuan foreign minster atan Wng Yi an ruat” tih chu state news agency Xinhua in a sawi dan awm chhuna ni a. “Qin Gang chu foreign minster atanga paihthlak a ni,” a ti bawk.
President Xi chuan Qin ban a nihna tur hian thuchhuah a nei tia sawi a ni a. Legislator te chuan China Cental bank chief Yo Gang kum lam avanga chawlh hun tawh pawh thlakin economist Pan Gongsheng chu a aiawh turin an ruat tiin Xinhua chuan a tarlang bawk.
Chinese Communist Party system hnuaiah foreign policy chu high-level official te siam niin chumi hnuah foreign minister chu an rorelna te kalpui turin an hrilh zui leh thin a ni.
Wang Yi hi career diplomat niin Japanese tawng pawh thiam a ni a, kum 2013 atanga 2022 chhun khan foreign minister nihna a lo chelh tawh bawk a. Tunah South Africa-ah Brics national security meeting a tel mek a ni bawk.
Observer te chuan kum 69-a upa Wang foreign minster atana ruat a nih lehna chu Chinese diplomacy tihngheh tumna tiin an sawi thung a.
Qin Gang kha Chinese sorkar a hmelhriat hlawh ber pawl a ni a. Tun hnaia mipui mimir hmuh tura a inlan miah ta lo chu diplomats leh China watchers te bakah Chinese mipuite pawhin mak an tih a ni a.
Thla kalta vel atang khan a duty pangngai ti tawh lovin hmuh turin a awm tawh lo va, Indonesia a summit neihah pawh tel lovin chutah chuan official te chuan a hrisel loh vang tiin an sawi thung a ni.
Mahse ministry atanga thuchiang tak leh felfai tak sawi lan ni thei lo avang chuan Qin chu politics thilah hrem a tawk ni theia ngaih niin extra-marital affairs kaihhnawih vang tia sawi a ni bawk.
European Union foreign policy chief Josep Borrell nena 4 July daih tawha meeting an neih tur pawh sawifiahna awm miah si lova tihkhawtlaiin alo awm tawh a ni.
Qin hi Chinese Communist Party chhunagfa most high-level official reitak chin hriatloha awm zinga pakhat a ni a. China high-profile figure te an chin hriat loha rei tak an awm lo thin chu thil thar a ni lo va, mahse, a tlangpuiin a hnuah criminal investigation kaihhnawih emaw vang a lo ni tlangpui thin.
Xi Jinping pawh kum 2012 a China leader a nih hnu kar hnih lekah a thawm hriat turin a reh reng tawh a, khatah erawh a hriselna kaihhnawih vang tia sawi a ni a.
Qin hi thleng sang chak tak niin China history a foreign minister ni thei naupang ber te zinga tel pha a ni a. A hma pawhin US ah ambassador niin a awm hrep tawh a, diplomat tha tak tia sawi niin nikum December thla khan foreign minister atana ruat a ni zui ta a ni.
A hma pawhin foreig ministry spokesman a ni tawh a, Xi Jinping a ram pawna zin vel ruahmantu ber niin hei vang hian China top leader nen pawha thawhdunna tha tak nei thei a ni.
Qin chunga thil thleng hriat duhna China ram chhungah a nasa hle a, China a search engine lian ber Baidu ah chuan Qin hming search a nasa hle bawk.
Qin Gang chu China defence na lamah thawhhlawk tak anga ngaih niin English thiam tak niin US a awm lai pawhin lartak mai a nia NGA games a free throw ah te pawh inlan niin UK a awm lai pawha langsar taka Arsenal tantu a ni a. Heng vaang te hian Communist party chhungah ‘wolf warrior’ ni tawk lova ngaihna te pawh a awm tia sawi a ni.
Ram pawnah erawh hniak phawi hauh lova China tan burtu niin chutah pawh phur taka a ram China tana theihtawp chhuahtu tia sawi a ni. Communist party in tunlai mi mithiam leh tha bawk si a mamawh em em tia an sawi zingah a tel bawk.
Qin Gang ban a nihna chhan hi inrinsiakna nasa awm mekin social media a sawi danah chuan television presenter hmeichhia pakhat social media a langsar ve tak nen an inngaizawng tia sawi a ni a. Chung thil thleng mai bakah chuan Communist Party chhunga a hmelma tena paihthlak an tumna nena kalkawp chu a tawrh phah tia sawi a ni bawk.