Daily Newspaper

China-in Hong Kong dan thar tur pawmfel ta

57

China chuan sawiselhlawh tak mai security law thar Hong Kong a thununna thuk zawk tur chu a pawm fel ta a, hei vang hian Hong Kong in zalenna a neihte chu a hloh nasa dawna ngaihna a lian hle. Thla kalta khan China chuan inlak hran duhna leh chu lam hawia chetna, firfiakna lam hawi chi reng reng chu dan kalh a nih tur thu a lo sawi tawh vangin duh lohna a lian nghal hle a.

China chetdan hi nikuma nasa taka lungawi lohna lantirna awm chhan leh pro-demnocracy movement nasa taka kalpui a nih phah hialna chhunzawmna zela ngaih a ni a.

Sawiseltute chuan China in dan thar a kalpui tur hian Hong kong identity chu a nuaibo thei dawnah an ngai a. Hong Kong-in judicial independence a neih te, China mainland-a awm ve lo a danglamna em em te chu pawlh dalin a awm tawh dawnah an ngai a ni. Hong Kong hi kum 1997 khan British chuan inremna an lo siam tawh angin China hnenah a hlan let a, mahse, inremna siamah Hong Kong in rights a neih thenkhatte chu kum 50 thlenga a ngai anga kalpui tura tih a ni thung.

Hei vang hian Beijing in May thlaa Hong Konga dan thar a kalpui tur thu a sawi pawhin khawvel pum huapin nasa takin dem a hlawh nghal a. He draft law hi mipui hriata tlangzarh hmaa pawmfel niin tun thlengin a kimchang engmah hmuh theiha tlangzarh a la ni lo bawk. China chuan dan thar kalpui tur chu buaina leh harsatna awm thei laka invenna tur leh sawiselna te chu sorkar tihbuai tumna zawk tiin a sawi thung.

Dan thar chuan?

China chuan he dan thar hi pawm fel a nih thu official in engmah a la sawi duh lo va. Mahse, National People’s Congress Standing Committee chuan session an neihah lungrual takin an pawm fel tawh tih chian a ni thung.

He dan thar hi Hong Kong Basic Law-ah telh a ni zui ang a, he dan hmang hian sorkar sawisela lungawi lohna lantir angte chu remtih a ni dawn hauh ta lo a ni. Hei mai bakah hian Hong Kong-ah national security office thar dah a ni ang a, hei hian thuneihna keng tel belh dawnin Hong Kong school-a national security education kaihhnawihah pawh thuneihna a nei tel vek ang. Hong Kong chuan national security commission a din a ngai dawn a, chu mi kaltlang chuan heng dan te hi kenkawh a ni ang a, Beijing chuan adviser a ruat thung ang. Hong Kong chief executive chuan national security case ngaihtuah turin judge a ruat thei bawk ang a, hei hi Hong Kong-in judicial independence a neih namnul tumna anga ngaih a ni ta chiah bawk. A pawimawh ber chu Beijing chuan dan sawifiah chungchangah Beijing chuan thuneihna a nei dawn ta a ni. Hong Kong dan nena inmil lo leh inhmu rem lo a awm reng rengah Beijing law chu a chungnung zel dawn tawh a ni.

Hong Kong a thlak danglam dan tur?

China-in Hong Kong dan thar tur pawmfel ta Mi tam tak tan chuan heng dan thar kalpui turte hian Hong Kong chu China hmun dang ang a nih lohna a nuaibo vek dawnah an ngai a, zalenna an neihte chu laksakin an awm dawnah an ngai a ni. Hong Kong mipuite chuan civil liberty an neih heng free speech, right to protest te leh independence judiciary an neihte chu an chhuan leh hlut em em a ni.

Sawiseltute chuan he dan thar hian Hong Konga lungawi lohnate chu a nuaimih vek tur thu sawiin, Chinese Communist Party chuan Hong Kong nunphungah thuneihna an nei vek tawh dawnah an ngai bawk.

A nghawng?

Hong Kong-a activists lar ber Joshua Wong chuan pro-democracy group Demosisto a kalpui chu a bansan tur thu sawiin a thawhpui Nathan Law leh Agnes Chow te pawhin an bansan tur thu an sawi nghal bawk. Rights group Amnesty International chuan dan thar chu ‘sorkar sawiseltute laka rahbehna ralthuam hlauhawm’ tia sawiin ‘Tun hnaia Hong Kong-a thil thleng tawha tha lo ber’ tiin a sawi bawk. Taiwan chuan a khua leh tuite chu Hong Kong tlawh lo tura ti nghalin China dan siam thar chuan Hong Kong zalenna, democracy leh human rights nasa takin a tichhe dawn tiin a sawi zui nghal bawk.

Washington chuan Hong Kong laka special status a pek chu tihtawpah a vau nghal a, he dan thar hi hman a nih ngat chuan European Parliament chuan China chu International Court of Justice, The Hague-ah khin an tum thu an sawi nghal bawk.

UK chuan immigration rules a neihsa chu thlak danglamin China in dan thar a kalpui chu a hmang lui a nih chuan Hong Kong khua leh tui maktaduai chuangte chu a khua leh tui nghet an nih theihna kawng a hawnsak tur thu a sawi bawk. June thla tir khan G7 ram te chuan Beijing chu he dan thar hi kalpui lo turin an lo ngen tawh bawk.

Eng vangin nge China in dan thar hman a tum?

Kum 1997-a UK-in China hnena Hong Kong a hlan let khan mini-constitution tih mai Basic Law bakah ‘one country, two system’ principle kalpui niin Hong Kong chuan zalenna thuk tak punkhawmna leh duh ang sawi theihna te independent judiciary te leh democratic right dang mainland China-a awm lo a nei a ni. He inremna hnuaiah vek hian Hong Kong chuan national security law siam tur a ni a, Article 23 of the Basic Law-ah fiah taka tarlan a ni.

Mahse, hei hi siam a ni ta ngai lo va, mipui tena an duh loh vang niin kum 2003 khan sorkarin siam a tum tawh a, dodalna a nasat em avangin a thulh phah tawh.

Tun hnai chhovah Beijing-in thuneihna man ngeh zual a tum avangin Hong Kong chuan buaina leh harsata a tawk chho ta mawlh mawlh a ni ber a. Kum 2019 khan extradition law kalpui tumna duh lohna lantir chu tharum thawhnaah chhuakin anti-China leh pro-democracy movement a pian phah bawk.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy