Daily Newspaper

China-in ram inthlengpuiah Bhutan a sawm nawn

32

China chuan Bhutan hnenah ramria buaina an neih chinfel nan ‘package solution’ pek turin rawtna a siam a, hei hi kum 1996 a Bhutan hnena hmar lama ram an inchuh pek a, China-in khawthlang lam Doklam tela a chan ve thung rawtna tharhthawhna anga ngaih a ni.

Chinese Ministry of Foreign Affairs (MFA) chuan Bhutan khaw chhak lama Sakteng te chu a ram angah a chhal ta bawk a, hei hi mithiamte chuan Beijing in Thimphu chu ramria inremna pawm lo thei lo tura a nawrna angah an ngai.

“China leh Bhutan ramri hi kham fel a la ni lo va, middle, east leh west ramri te chu inchuh mek lai a ni. Heng buaina chinfel nan hian China chuan package solution a siam a ni,” tiin Chinese Ministry of Foreign Affairs thupuangtu Wang Wenbi chuan a sawi.

Kumin June 2-3 a UNDP kaihhruai Global Environment Facility meeting neihnaah China aiawh chuan Bhutan a Sakteng forest sanctuary chhawmdawlna tur dan tuma chet la in ram inchuh lai a ti a, mahse, an hnawlsak a. Bhutan aiawha ding India palai chuan he thil hi hnawlin chhawmdawlna pek a ni ta tho a ni.

Kum 1984 atang tawh khan China leh Bhutan chuan ramri chungchangah inbiakna an nei tan tawh a, khatih lai khan ramri buaina chu Pasamlung leh Jakarlung valley hmarlam (Chna in middle area ati thung) leh Doklam leh khawthlang lama pasture lands te a ni a. Khawchhak lama Bhutan ramri, Arunachal Pradesh nena inrina chu ramri inchuhah a tel ngai reng reng lo.

“Bhutan tana hriat tur pawimawh em em mai a, khawchhak lama Sakteng area chu China nena ramri inbiakna tum tam tak neih tawhah sawi lan a ni ngai reng reng lo. Tuna China chetlakna hi tum neisa ran thil tih a ni” tiin India Foreign Secretary hlui Shyam Saran chuan a sawi.

Inbiakna tum 11 neih hnu 1996 khan khatih laia Bhutan Lal Jigme Singye Wangchuck (tuna King ni mek pa) chuan Bhutanese National Assembly ah China chuan ‘hmarlam phaizawl, 495 square kilometer chu khawthlang lama pasture land (ran tlat theihna) 269 square kilometres nena inthleng a duh’ tiin a hrilh a.

Inremna awm ta se chuan Bhutan chuan ram zau tak a neih belh dawn a, China nena an buaina pawh chinfel a ni bawk ang a. Mahse, India tan chuan hlauhthawnawm ni thungin Doklam inthleng chuan China sipai PLA te chu hmun pawimawh lutuk Siliguri corridor ‘chicken neck’ chu tlawh pawh theiin a siam thung dawn a ni. Chinese MFA chuan ‘package solution’ a siam hi a kimchangin a saiw lo na chungin a hmaa rawtna a siam zul tho a nih rin a ni.

Bhutanese MFA emaw India MEA te chuan engmah China thuchhuakah sawi an la nei lo thung.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy