Daily Newspaper

China-in US nena inthurualah India a puh

14

China chuan India-in Chinese apps 118 a khap thar chu na taka sawiselin, New Delhi chu ‘national security concept hmang khaw lo’ tia puhin India chu United States nena tangrualin Chinese company te an bei a ni tiin a sawi bawk.

China chuan US Deputy Secretary of State Stephen Biegun an tunkar tir lama India leh China ramri chungchang buaina a sawiah sawiselin US chu a chawk buai zawnga inrawlhah a puh bawk.

“India-China ramri buai chungchangah, China chuan inremna hnuaiah inthianna rilru pu chung leh pawm tlan dun theiha dik leh fel taka chinfel a duh thin,” tiin New Delhi a Chinese embassy chuan thuchhuah a siam a.

“Hun eng emawti chhung chu ram pahnih ten inbiakna level hrang hrangah ramri buai chinfel a nih theihnan an nei tawh a. China leh India te hian ramri buai chingfel turin theihna an nei a ni. Kan region pawna ram dang ten kawk chunga chetlaa a buaichuar zawnga hmalakna an neih hian helai bial remna leh muanna tur a tichhe zawk,” tiin a sawi bawk.

Beijing-ah chuan Commerce Ministry leh Foreign Ministry te chuan India app ban chu bei let nghalin, “Indian te hian ‘national security’ concept an hmang sual a, Chinese company te lakah thleibikna kalpuiin WTO dan an bawhchhia a ni. China chuan India chu a tihdikloh te siamtha turin a ngen,” tiin Ministry of Commerce thupuangtu Gao Feng chuan a sawi.

“India-in Chinese apps a khap hian Chinese investors leh service providers te legitimate rights leh interests a bawhchhia a ni mai lo va, Indian consumers leh investment environment open economy a nihna angin a bawhchhia a ni,” a ti bawk a.

“China-India economic leh trade cooperation hi ram pahnih te tana tha ve ve a ni a. Ram pahnih ten thawhhona tha leh hmasawnna neih zel theih nan inhawng tak leh business environment dik leh fel tak neiin an kalpui ngei beisei a ni,” tiin a sawi bawk.

Foreign Ministry pawhin thuchhuah siamin India-in 118 apps a khapah US nena thawhdunna a awm a, June thlaa Chinese apps 59 khap bawhzui zelna a ni, an ti bawk a.

“He mi ni vek hian US State Department chuan India-in Chinese apps 100 chuang a khap thu a sawi nghal a, ram dangte pawh Clean network initiative-a hmalakna nei turin a ngen bawk a. Hei vang hian India leh US hian thawhdunna an nei nge pawh ka hre lo,” tiin Chinese Foreign Ministry thupuangtu Hua Chunying chuan a sawi.

Hua chuan US chu ‘digital gunboat diplomacy’ kalpuiah leh ‘Chinese sumdawnna tihchhiat tum’ ah a puh bawk a, China chuan ‘India hian ama thuin thutlukna a siam thin a vawn nun kan beisei’ tiin a sawi bawk.

“India hi ancient civilisation nei leh fing tak an ni a, cyber security ah US lo tih tawh te entir nan Dirtbox, Prism, Irritant Horrn, Muscular leh tuihnuaia cable tapping te a hre reng tur a ni” tiin wiretapping leh malware programme chungchang a sawi a. “Indian mipuite hian US in cyber security ah an fihlim nge fihlim lo hrilh turin finna an nei a ni,” tiin a sawi bawk.

“China leh India mipuite hian sector hrang hrangah thawhhona tha tak kan neih theih kan ring a, hun rei lote chauh thlirin ram pahnih leh mipui tena hun rei tak hnua an hlawkpuina tur an hmuh hmaih tur a ni lo,” tiin Hua chuan a sawi bawk.

“Ram pahnihte hian ancient civilisation leh culture turu tak kan chhuan em em leh kum sang tam tak inthleng tawn tawh kan nei a ni,” a ti bawk a.

Hua chuan China a Rabindranath Tagore poem larzia sawiin a poem tlar khat “We read the world wrong, and say it deceives us” tih chu a sawichhuak bawk a.

“China-ah Yoga a lar zual zel mek a, kei ngei pawh hi Indian culture ngaina ka ni,” tiin a sawi bawk.

Indian culture emaw poem emaw te hi Chinese culture tana hlauhawm leh chhia a ni reng reng lo a ti bawk a. India hian ram pahnih te inthianthatna leh inmamawh tawnna te hrefiahin thawhhona tha an duh ngei kan beisei a. Indian mipui te hian an culture-ah rintawkna an nghatah kan ngai bawk, tiin a sawi bawk.

(THE AIZAWL POST – Rampawn)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy