Daily Newspaper

China-in ‘WolfWar diplomacy’ hnawl

13

China chuan a diplomats tena sawiselna beihlet nana huaisar taka tawngkam an hman thin avanga ‘WolfWarrior diplomacy’ kalpui anga an puhna chu a hnawl thu sawiin Beijing sawisel tutena China vauna theory an kalpui tho a ni tiin a sawi.

“Thil chiang tak chu ‘Wolf Warrior diplomacy’ hi ‘China threat’ theory version dang leh ‘discource trap’ tho a ni” tia sawiin Vice Foreign Minister Le Yucheng chuan a tum ber chu China-in a beihlet khapsak a nih thu a sawi.

China diplomats te hian global issue hrang hrangah te pawh langsar lo takin engkim an kalpui thin a. Mahse, tun hnai kum chhovah an chetdan thlak danglam vekin Wuhan atanga pandemic chhuak te, Xinjiang a mass internment camp kalpui te leh Hong Kong national security law kalpui avang tein a danglam hlea ngaih tawh a ni a.

China-in a chetdan a thlak takna chhan hi President Xi Jinping hruaina hnuaia Communist Party of China (CPC) tena ‘aggressive nationalism’ an kalpui tak vang nia sawi a ni bawk.

Vice Foreign Minister Le Yucheng chuan ram lian mawhphurhna nei a nih angin China chuan international order thlawptu niin global governance contributor a nih bakah international public goods petu a ni a ti a.

Khawthlang ram atanga hleihhluak taka sawiselna kalpui a tlem taa a lan laiin khawvel leh Chinese diplomats te chu an inthlak ta a ni, tiin CPC te tabloid Global Times ah ziah a ni a.

Khawthlang ram thenkhat mitah chuan Chinese diplomats te chuan kum 2015-a Chinese patriotic action film leh kum 2017-a a zawmna tih chhuan ‘WolfWarrior’ style diplomacy kalpuiah an ngai a. “Thil inthlak danglam hian Khawthlang ram te rinhlelhna a siam a ni,” tiin ziah lan a ni bawk.

He tawngkam hi kum 2017 a tihchuah Hollywood Rambo style Chinese action film WolfWarrior 2 atanga lakchhuah a ni.

China ambassador-a India rama awm reng tawh Le chuan ‘WolfWarrior’ style diplomacy kalpui anga puhna chu China diplomacy hriatfiah tawk loh vang tia sawiin China chu nun dan mawi duh ram, lungrualna ngaihlu leh midangte ti thinur duh ngai lo leh inhnial tura midangte kawng kik ngai lo a ni zawk tiin a sawi a.

“China chuan national interest leh dignity humhim tura chetlak mai loh chu tih theih a nei lo, ram dang te hian kan kawngka kikin kan ram chhung inrelbawlnaah inrawlh tumin min namnul an tum a ni,” tiin Le chuan a sawi bawk.

Mi thenkhat tena China chuan a aggressive diplomacy hmangin khawvel hmun tinah hmelma a insiam anga an sawina chu a dik loh thu a sawi bawk a.

“Thian siamin inzawmna tha tak kan siam ziah a. Ram lian thenkhatte ram tenau zawk te hnena ‘kan thu lo chuan kawng dang a awm lo’ tia chet la te hian ram dang an nawr zawk a ni. Mahse, chung chu a thleng reng chungin China ‘circle of friends’ chu tet lam aiah len lam a pan tial tial,” tiin a sawi bawk.

Ram thanglai mek leh thian tha ram te chuan heng nawrna te hi hnawlin China nena thawhhona an kalpui mek zel a, khawvel huap thilah pawh China thlawpna an sawi chhuak mai thin, tiin Le chuan a sawi bawk.

Hetihlai hian U.S. National Intelligence Director atanga chawlmai tawh tur John Ratcliffe chuan World War II hnua America leh khawvel tana hlauhawm ber chu China tiin a sawi thung.

“Thil chiang tak chu Beijing in US leh khawvel ram tin te chu economic, military leh technology hmanga awp a duh a ni,” tiin Ratcliffe chuan The Wall Street Jpounralop-ed ah a ziak thung.

“China major public initiative tam tak leh an company lian te hi Chinese Communist Party hmelma bumna hmanrua mai mai a ni. Economic inenthlakna ‘ruksak, a anga siam leh thlak thleng’ an kalpui a ni” tiin Ratcliffe chuan a sawi bawk.

China Foreign Ministry thupuangtu Hua Chunying chuan he puhna hi hnawl thungin ‘information dik lo, political virus leh dawtthu’ tia sawiin China tihhminghliau tumna leh China-US inlaichinna tihchhiat tumna tiin a sawi thung a.

‘Engmah thil thar a awm lo, dawt leh thuthang sawi nawn leha China hmel tihbalha China tihchhiat tumna vek a ni’ tiin Hua chuan a sawi thung a, “Dawt muhlum US sorkar department tena an thehdarh leh a ni,” tiin a sawi bawk.

Thla kalta khan Chinese Foreign Ministry thupuangtu Zhao Likian chuan FIve Eyes ram (Australia, Canada, New Zealand, United Kingdom leh United States) tena Hong Kong pro-democracy lawmaker te ban avanga China legislature an sawiselna chu chhang letin, “Mit engzah pawh nei mah ula, China sovereignty, security leh development interest te tihchhiat avanga mitmu kerchhuaha a del loh nan fimkhur rawh u,” a lo ti tawh bawk.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy