China leh Russia inhnaih tual tual

Vladimir Putin chu dawhkan sei ngaina deuh mai tia sawi a ni a. Meeting a neihpuia thlalak phochuah te a larpui hle a, chung meeting-ah te chuan amah Putin chu a sir tawpah thuin a biak leh titipui ber pawh hla takah thu in a hre pha tha ang em tih mai tur a ni thin tia sawi a ni.
Mahse, chu chu China top foreign policy official Wang Yi nena an inhmuhnaah chuan a thleng ve hauh lo. Hnaih takah inthutchilhin inchibai phak lekah a laia oval-shaped table indahnaah an thu dun a ni.
Putin-an midang a hmuh chang chuan dawhkan sei takah lehlam lehlamah inhmachhawna thut thin a ni a. China palai nena an inbiaknaah erawh chutiang a ni ve ta hauh lo thung a, dawhkan sirtawnah ni lovin a laiah inhnaih takin an thu dun zawk a ni.
Thlalak phochhuah a nih chiah hnuah Putin chuan a thian a hnaih em em a bula a awma him nia a inngaihna nena an titidunna thlalak tia sawi theih a ni a.
Mahse, chutiang chu tun hma chuan a ni vek lo thung. Kum sawm kalta vel kha chuan Beijing leh Moscow chu inbakkaih rengin Chinese capital ah chuan khua leh tui te Soviet Union nena nuclear hmanga inbeihna awm thuta an inhimna turin lei hnuaiah tawmna tur te siam hial a ni.
Tunah erawh Xi Jinping sorkar hnuaiah Russia chu US influence beihlet nana hmatawng a ni tawh a. North Korea ram ang te chu khawvelin a ensan a ni mai thei a, mahse, geopolitics lamah China leh Russia tan an pawimawh thung tlat.
Nikuma Beijing-a Winter Olympics neih a nih khan a hawnnaah Vladimir Putin chu a tel a, China nena inlaichinnaah ‘bithliah awm lo’ tihiala sawiin Russia a let leh hnu kar khat lekah Ukraine a run zui a ni.
Hei vang tak hian mi tam tak te chuan China hotu Xi Jinping chuan Russia-in Ukraine a run tur a hrelawk vek an tih phah a. Putin chuan thil awm dan hrilh lawk sa vekin Xi Jinping chuan a hre lawk vek an tih phah a ni.
Ukraine chungchangah China chuan Russia kaihhnawih thilah sawi a nei duh lo hle a. Ram pakhat sovereignty inzahsak tih chu sawi berah China chuan a nei reng a, mahse, Russia demna emaw a sawi ngai lo, Beijing chuan neutral a inti reng a, mahse, tun hnaiah tan bik nei lo tia a inchhalna chu a duap tana ngaih a ni tawh thung.
Inbiakna an neih zawh hnuah Wang Yi chuan China leh Russia te chuan ‘remna leh muanna’ a awm theih nan hmalak dun ni se an ti a ti a. Khawvel hmun dang atanga thlir erawhin Russia-in Ukraine a run kum khat thlen dawn ruaia Russia tlawha chuta inbiakna neiha ‘remna leh muanna’ sawi chu thil inhmeh lova ngaihsak a ni thung.
Heng zawng zawng hi Beijing chuan a hai hauh lova, dem a ni dawn tih pawh a hria a, sawisel a ni dawn tih pawh a hria a, mahse, Vladimir Putina hnena moral support pek chu a ram tan buk buk hnuah tha zawk tura a ngaih vang a ni an tihsak thung.
Wang Yi an Sergei Lavrov a hmuh veleh, “Ka thian ngaihdan inhrilh tawn ka inpeih a, kan ram pahnih tana hlawkna turah inremna thar kan siam theih ka beisei,” a ti nghal a ni.
Russia foreign minister pawhin inngaihsak tawnna leh ram pahnih te ngaih pawimawh inzahsak tawn chu khawvel buai zual zel karah tul a ti ve nghal bawk a ni.
Tunkar tir lam khan Beijing-ah China Foreign Minister Qin Gang chuan Ukraine buaina chu ram hrang hrang tena ralthuam an pek luh belh zel chuan tihmih theih lohin a alh zual zel a hlauh thu a lo sawi tawh a.
Hei hi US leh ram dang tena tun hnaia Ukrainian army te hman tur ralthuam an pek a sawina niin chutih rual vek chuan US chuan China chu Russia hnena ralthuam pe lo turin a vau lawk zui nghal bawk.
Analysts te chuan President Putin an indona tualzawla mualphona nasa tak a hmachhawn ai chuan engtianga puih tur nge tih an ngaihtuah tiin an sawi a. America a researcher te chuan Beijing chuan Russia hnenah hian dual-use equipment, civilian technology anga lang mahse ralthuam lama hman theih entir nan fighter jet siamthatna tura hman theih ang chi a pe lut der tawh an ti.
Hei mai bakah hian China chuan Russia oil leh gas te tam tham tak a leisak reng bawk a. China chu Russian oil leh gas te ram dang tena kawmserha an leisak duh loh laia man tlawm zawka chawlut nasa em em a ni mek a ni.
Vladimir Putin chuan Wnag Yi hnenah Chinese president Xi Jinping chuan hun reilote hnuah Moscow a tlawh theih a beisei thu a hrilh a, Xi Jinping hian Moscow tlawh ngei a tum nia sawi a ni bawk.
Kremlin chuan China tan dirty work khawih mekin Western military resource te tiphai zelin Nato pressure ape zel a, chumi avanga Russia economy in a tuar a nih chuan Beijing tan eng nge a pawina? Moscow chuan insiamtha turin Chinese products tam zawk a mamawh belh dawn tihna mai a ni a, China tan chuan hlawkna hlir zawk tur a ni.
Western ram te chu an inlungrual tlat a, Russia chuan Ukraine indonaah chak zawk a nih theih hmel loh bawk a, chutih lai chuan China chu fing takin lehlam lehlam tlawhpawh theih turin leh Europe a indona chu rei zawk awh a nih theih nan a che tia ngaih theih a ni bawk.
China chu a fimkhur a ngai hle tia sawi a ni a, a thial theih bak inbarh a tum chuan a talbuai dawn thova ngaih a ni a, chutihrual chiah chuan khawvel chuan Asian giant chu tuna a inrawlh thukna aia he indonaa inrawlh belh lo turin an duh tia sawi a ni bawk.