China-a political conclave pawimawh chu March 4 khan Beijing-ah tan a ni a. Officials te chuan economy tlahniam leh thalai hna nei lote chu ‘ngaihmawhawm’ tia sawiin ruahmanna an siam tur thu an sawi.
Kum tina neih thin “Two Sessions” ah hian China hmun hrang hrang atangin palai ten Beijing khawpui an pan khawm a.
Chinese People’s Political Consultative Conference (CPPCC) meeting ah hian President Xi Jinping mai bakah party hruaitu lawk tinte chu tel vek dawnin Pathianni, March 10 ah khar a ni ang.
CPPCC thupuangtu Liu Jieyi chuan economics topic chu ngaihven ber a ni ang tiin member sang hnih chuang te chuan an ngaih pawimawh ber tur a nih thu a sawi a. Hei mai bakah hian thalai hna nei lo, a bikin graduate thar te chungchang pawh ngaihtuah a ni ang a ti a, kum 2023 tawp lam khan youth unemployment chu 15% vel lai a ni.
CPPCC meeting rual chiah hian National People’s Congress (NPC) pawh a ni dawn tho a. NPC hi chu March 5 ah an tan ve thung dawn a, March 11 thleng a awh thung dawn tiin spokesperson Lou Qinjian chuan a sawi a.
Lou chuan Beijing leaders te chuan economy chuan hma lam a pan leh dawn tia an rin tlat thu a sawi bawk a. “China hian a economic development thilah dinhmun tha a ngah zawk” tiin a sawi a. “Economy rebound a thleng leh mek a, long-term growth pawh inthlak danglam a la awm lo” tiin a sawi bawk.
Mahse, Premier Li Qiang chuan tih thin dan titawpin NPC meeting neih zawh niah press conference a nei dawn lo tiin a sawi thung. Li hian nikuma briefing a neihah China economy thanna tihpun chu thil awlsam a ni dawn lo tiin a lo sawi tawh a ni.
China political conclave pawimawh tan ta
