Site icon The Aizawl Post

China population tlahniamin nghawng

China population chu kum sawm ruk hnuah a tum khat nan a tlahniam ve ta a, official statistics tihchhuah hnuah population tlahniam hian hun rei lo te tal chhung chu China tan duhawm lo zawk a thlen ang tiin mithiamte chuan an sawi.
Kum 2030 hnu lamah erawh demographic stress chuan growth lamah khawvela economy lian ber pahnihnaah harsatna a thlen tawh lo thung ang, an ti bawk a.

A kum hmasa aiin Chinese mipui te chu 850,000 a tlem zawkin 1.4118 billion an la ni tho thung a. Naupiang a kum telin an tlem tial tial tawh sa a, thuneitute chuan naupiang an pun theih nan hma an la thung a, kum sarih kalta khan one-child policy pawh an lo bansan tawh bawk.

Mahse, tuna an dinhmun leh harsatna hi chuti maia chinfel theih chi a ni lo niin economist leh demogrpahers te chuan an sawi a, Chinese mipuite chu kum upa an tam tial tial bawk si a ni.
Kum upa tam chuan ecoomy ah harsatna a thlen nasa a, mahse, China tana ngaihmawhawm ber chu kum upa pung chak lutuk leh naupiang tlem chak lutuk bawk si chu a ni. A awmzia chu China-ah chuan hausak hmain an upa hman tihna.

Kum 60 hnuah a tum khat nan population a tlahniam a, naupiang tlemin record a siam a, researchers te cuan kum 2018 atang khan naupiang an tlem chak tan tiin an sawi.
China-a hnathawk thei population chu kum 2012 atang khan an tlahniam tawh thung a. Age-dependency ratio, naupiang leh pension tawh te leh hnathawk thei te ratio chu kum 2010 a 37.12% atangin kum 2020 ah chuan 44.14% ah a kai chho a ni.

UN chhut dan chuan Chinese kum 15 atanga 64 inkar te chu tun kum zabi ah hian 60% in an tlahniam ang an ti.

Mahse Andrew Harris, deputy chief economist, Fathom Financial Consulting chuan China chuan rural labour force man tlawm tak tak a la nei teuh a, hengte hian urban area-a manufacturing lama hnathawk tur awm lo chu an hnawhkhat thei ang a ti thung.

Harris chuan manufacturing leh construction sector-ah dulna nasa tak a awm a ti a, construction sector a chhawr hmun thuma thena hmun khatte hi underemployed an ni a, a awmzia chu an tharchhuah theih tura hisap aia tlem zawk thawk chhuak an ni tihna.

Paul Cheung, Singapore’s former chief statistician chuan China chuan manpower a la ngah lutuk a, demographic lama harsatna sukiang turin hun a nei tawk bawk a ti a. “Tun dinhmunah chhe nghal rum rum lam an ni lo,” tiin a sawi bawk a.

Kum 2019 khan Chinese Academy of Social Sciences te chuan kum 2035-ah chuan China pension fund rinrawl ber chu hnathawk an tlem zel avangin a ruak tawh dawn tiin an lo sawi lawk tawh thung.

China population tlahniam hian global economy-ah nghawng a nei nghal dawn thung a. Pakhatnaah chuan hnathawk thei tlem chuan labour cost a tisang a, chu chuan consumption leh production cost a tisang dawn a ni. Tun hnaiah pawh ‘factory of the world’ tia sawi China chuan manufacturing operation lamah Asia leh South America a developing ram te lakah a hloh nual tawh a ni.

“China-a labour force tlahniam hian manufacturing recession siamin chu chuan US leh EU ah thil man a ti sang ang,” tiin Yi Fuxian, University of Wisconsin-Madison a researcher leh China-in a hnawl tak one-child policy lo sawisel nasa tawh tak chuan a sawi a.

China-in naupiang tipung tura hmalak tharna a neih lah a hlawhtling lo takzet a ti bawk a. A growth a that reng theih nan China chuan kawng dang a dap a ngai dawn tih a ni bawk a. Chumi tur chuan politics lamah thutlukna harsa tak siam a ngai dawn a ni tiin George Magnus, Oxford University a China Centre a independent economists chuan a sawi.
Entirnan, retirement age te chu a tihsan a ngai ang tiin Magnus cuan a sawi a. Tunah chuan China a pension kum chu 60 mipa tan a ni a, OECD average chu 64.2 a ni thung a. Hmeichia civil servant te tan kum 55 a ni a, hmeichhia blue-collar worker te tan chan 50 a ni thung.

Pension kum tihsan hi tum tawh thin a ni a, mahse, China mipui ten an duh lo hle thung tawh a ni.

A tih theih dang chu mipui tam zawk hnathawk an awm theih nana immigration mumal zawka kalpui a ni a, mahse, hei hi chu Chinese Communist Party tena an duh ngai loh a ni thung.
Mahse, tunah chuan a economy than nana mihring a ngah tia a sawi leh inghah thinna chu innghah nana hman theih a ni tawh dawn lova ngaih a ni a, mahse, a growth awm theih nana thil dang atanga source a neih theih chuan a pawina a awm lo tiin observer thenkhatte chuan an sawi.

Exit mobile version