China leh Russia naval forces te chuan southern China-a military port-ah joint exercise an nei ta a. Sipai nunchan an zirdun hma lawk hian NATO chuan Beijing chu Ukraine indona tipunluntu tiin a puh a ni.
Chinese defence ministry chuan thuchhuah a siamah ram pahnih sipai te chuan western leh northern Pacific Ocean te an hrut thu sawiin operation an neih chuan international leh regional dinhmun engmah nghawng lovin third party bitum an nei hek lo a ti bawk.
Sipai nunchan hi Guongdong province-ah bul tan niin July thla laihawl vel thleng awh tur niin ram pahnih navy te chuan an theihna hrang hrang te an lantir dawn a, anti-missile exercise, sea strikes leh air defence te pawh a tel dawn a ni.
Xinhua News Agency chuan Chiense leh Russian naval forces te chuan Zhanjiang a opening ceremony neih hnuah on-map military simulation leh tactical coordiantion exercises te an nei tiin a tarlang bawk a.
Hetih lai hian kar kaltaa NATO allies tena thuchhuah an neih avangin Nato leh China inlaichinna a sosang hle a. Ram 32 telna NATO member-te chuan Washington-a summit an neihnaah China chuan military alliance a thlurbing zel tia sawiin Ukraine indonaah Beijing chu Russia puitu an ti bawk.
NATO leh Indo-Pacific-a an partner te chuan Russia leh Asia rama a zawlpui a bik takin China te atangin security thilah ngaihthatlohna an neih len tial tial thu an sawi a.
China chuan NATO te chu chhangin an security sawi chu midang te chhiatna thlentu tiin Asia ramah buai nuai nuai thlen tumah a puh thung a. China foreign ministry thuchhuah chuan China chuan Ukrinae indonaah thlawp bik a nei lo a ti bawk.
Kar kalta khan US Coast Guard te Bering Sea a routine patrol a kal te chuan Chinese military ship te international water-ah a hmu hlawm a. China indo lawngte hi Aleutian Islands a Amchitka Pass atang hmar lama 200 km velah hmuh niin helai hmun hi North Pacific leh Bering Sea inzawmna lai vel a ni.
A hnu lawk pawhin China indo lawng pali lai chu Amukta Pass hmar lam 84 miles velah hmuh an ni leh bawk. Mahse, US chuan Chinese naval vessels te hian international rules leh norms te an zawm a ti thung.
China-Russia ten sipai nunchan zir dun
