Daily Newspaper

Chirag Paswan vangin BJP ten ruahmanna an thlak mai thei

26

BJP te chuan an thawhpui Chirag Paswan an Bihar inthlan awm turah party mala din a tum tak avangin an candidate turte ennawn an neih phah dawn nia sawi a ni.

BJP hruaitu lawk Bihar in-charge Devendra Fadnavis leh Deputy Chief Minister Sushil Kumar Modi te chuan Delhi -a BJP chief JP Nadda chenna Inah meeting an nei zui a ni.

Pathianni khan Prime Minister Narendra Modi, Nadda te bakah hruaitu lawk zual central election committee te chuan Bihar seat leh candidate chungchang sawihona an nei tawh bawk.

Chirag Paswan hi Lok Janshakti Party (LJP) leader niin National Democratic Alliance angin inthlan an hmachhawn loh tur thu a sawi a, BJP te nen buaina an neih loh thu leh Chief Minister Nitish Kumar nena harsatna an neih zawk vang a nih thu a sawi.

Chirag Paswan a pa hi Prime Minister Narendra Modi sorkara minister ni mek Ram Vilas Paswan a ni bawk. Paswan chuan Bihar inthlan zawhah BJP te nen sorkar an siam tur thu a sawi a. Chu mai bakah Nitish Kumar party Janata Dal United (JDU) te khing tura candidate an siam tur thu a sawi a, BJP te candidate te erawh an khin loh tur thu a sawi bawk.

Chirag Paswan thutlukna siam hi Delhi a BJP leadership te tan chuan malsawmna anga ngaih zawk niin BJP te chuan Nitish Kumar a duh ang anga a awm loh nana ‘Plan B’ neih theihna anga ngaih a ni. Paswan an mal din a sawi hnuah BJP leader pakhat mahin sawizui an nei lo bawk.

BJP leh JDU tena inremna an siamah chuan Bihar a seat 243 awmnaah JDU ten seat 122 an chang ang a, BJP ten seat 121 an chang thung ang a, BJP te chuan an seat chan atangin LJP te hi an sem then ve tur a ni thung.

LJP te hian Dalit ho vote an kawl teuh a, tuna an chetlakna ang hian inthlan dangah pawh chet an la tawh a. Kum 2005 khan khatihlaia an thawhpui RJD te kalhin hma an la a, Lalu Yadav party-in an chak zawh loh phah tawh a. Sorkar siam thei an awm loh hnuah inthlanna huaihawt leh niin Nitish Kumar an sorkar siam turin seat mamawh tawk a neih phah tawh a ni.

Chirag Paswan chuan tun hnaiah Nitish Kumar a sawisel reng a, coronavirus crisis leh migrant crisis ah Nitish Kumar chu a sawisel na hle a ni. Hei bkaah hian Nitish Kumar an NDA a Chief Minister hlui Dalit leader tho Jitan Ram Manjhi lakluh tuma a beihna chuan an boruak a tichhe zual bawk.

(THE AIZAWL POST – Ramchhung)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy