Chopra hnehtu Nadeem kutah Rs. 40,00,000 a lut
Hun dang zawng zawngah chuan Olympic Games-ah hian medal late kutah pawisa fai pek an ni ngai lo a, kumin Paris Games atang khan World Athletics bik chuan track and field athlete zinga gold medal late hnenah sumfai pek a tiam a, an lo intiam tawh angin men’s javelin throw-a defending champion Neeraj Chopra laka chungnung taka hnehna changa Olympics gold awrhtu Pakistan tlangval Arshad Nadeem hnenah US dollar 50,000 an pe a, chu chu Pakistan pawisain cheng nuai 40 zet a tling.
Metre 92.97 zeta thui khawha Olympic record thar siamtu Nadeem kha Pakistani athlete zinga Olympic individual event-a gold medal awrh thei hmasaber niin, World Athletics atanga prize money heti zat a dawn piahlamah hian an ram sawrkar neuh neuh atangin hei aia tam hi rut zui tura ngaih a ni.
Indian track and field athlete zinga Olympic vawihniha medal la zawn thei hmasaber Neeraj Chopra thung chuan World Athletics atangin sum fai dawn a nei ve ta lo a, a chhan pawh prize money hi khawvela athletics thuneitu sang ber hian silver leh bronze medal late tan kumin hian a la tiam ve tlat lo a, gold medalist-te tan chauha tih a nih rih vang a ni.
2028 Los Angeles Olympics atangin silver leh bronze medalist-te pawhin prize money hi an dawng ve tan ang.
Neeraj Chopra hian kum 2016 December thla khan 4 Rajputana Rifles unit chu Junior Commissioned Officer (JCO) niin a zawm a, Naib Subedar atang chuan Asian Games and Commonwealth Games gold medal a sualchhuah hnuah kum 2018 khan Subedar-ah kaisantir a ni a, Tokyo Olympic-a gold medal a awrh hnuah Subedar Major rank pek ni lehin, tuntum Paris Games-a silver a awrh hnu hian rank sang zawk an pek leh ngei a rinawm a, chu erawh sawrkar atanga a sum dawn tur nen tarlan mai theih a la ni rih lo.
Chopra hnehtu Nadeem kutah Rs. 4,000,000 a lut
