Daily Newspaper

Chuhvel rama police camp-ah tui leh êng mamawh

34

Aizawl, July 19 : Assam lamin Mizoram a nek mekna zing ami, Chuhvel rama Mizoram police awmhmun khuarnaah tui leh kawlphetha mamawh ang an hmuh that loh avangin harsatna a awm a. Duty-te awmna tur camp pawh khawtlangin an sa tha mek zel.

The Aizawl Post palaiin 2021 July 17-a Chuhvel leh a chhehvel an fannaah Mizoram leh Assam ramri chungchanga boruak awm mekah Assam lamin hma an la chak hle a, hmun hrang hrangah Mizoram an nek tih hmuh a ni. Assam lam hian ramri an vil uluk hle a, Inrinni pawh khan Assam police engemawzatin Chuhvel ram, Mizoram nena inrina an thlithlai a, drone hmangin an enfiah.

Inrinni khan Mizoram police awmna tur camp sain Chuhvel khua an hnatlang a, mi 50 chuang an thawkchhuak. Camp sak hnatlang neih a nih lai hian ralkhatah Assam Police hmuh an ni a, Mizoram police-ten lo hmachhawn turin awmhmun an siamfel nghal. Hun engemawchen nghah an nih hnu pawh Assam lam hi an rawn inlan loa, drone hmangin an enfiah ta zawk nia hriat a ni. Drone hi Mizoram police camp chung zawnah tumhnih a thlawk kual a, a thlawk rei thawhkhat hle. Police duty-ten kahthlak an chak hle a, kah phalsak an ni lo thung.

“Chuhvel rama awm Mizoram police-te an huaisenin, an inpekna a fakawm hle a. Assam police hmel hmuh a nih hian mortar nen an inpeih nghal thlap a, inkah an ngamzia an tilang. Assam lamin vawihnih ngawt drone an tirh hnu hian mihring erawh chu an inlan zui ta lo thung,” The Aizawl Post palai hian a ti.

Mizoram police camp atang hian Assam lamin ramri panna kawng an lai thawm a hriat phak a, lirtheia ramri tlan thleng thei turin an inpeih har tawh lo tura ngaih a ni. Hetihlai hian Mizoram lam inbuatsaihna erawh a la tawk lo a, lirtheia duty camp thleng thei turin hun a la duh hle tura ngaih a ni. Tunhnaia helai hmuna boruak inmun chhoh tanna – John Halliday huan phai thlen hmaa Sihlui-ah lei dawh ngei ngei a ngai a, lei dawh hmasak loh chuan lirthei pangngai tan lui kan theih a ni lo.

Mizoram police hi helai duty-naah hian engemawzat an awm a. Zualnuam SDO (Civil) Andy Lalfakzuala Varte chuan a hmunah a awmchilh deuh chawt a ni. Camp awmnaah hian tui a harsa hle tih sawi a ni. “Tui chawi tur hian hmun hla tak pan a ngai a. Tui a harsat vangin duty camp awmna atanga km.1 vela hlaah eirawng bawl a ngai a, chet vel a tibuaithlak hle,” kan palai chuan a ti a. Ramri-a duty-ten kawlphetha an mamawh hle tih sawiin, “Eng an nei lo hian chetvel a tihar viau a. Inrinni (July 17) khan Zawlnuama Power & Electricity department aiawhten eng pek dan tur an enfiah a, hmalalak zui thuai an tum,” a ti.

Chuhvel hi Bairabi atangin km.14-a hla a ni a, Bairabi lam atanga chhiar chuan Saikhawthlir dawt chiahah awmin, Mizoram police camp panna kawng hi Saikhawthlir lam atanga kalin Chuhvel khaw kawtchhuahah a awm. Kawngpui pangngai atangin kea kal a ngai a, kawngpui pangngai atanga camp awmna hi km.3 vela hla a ni. Ruahtui a tlak tam avangin kawng a diak rih hle a, ke kawng phei chu a nal zual hle nia sawi a ni.

Chuhvel khua hi in 120 awmna niin, mihring 600 chuang hret an awm. Mizoram police camp sa hian khawtlang huap hnathlang vawihnih an ko tawh a, hnatlang tur inthlanchhuah tum an nei zauh zauh bawk. Hei bakah hian Mamit atangin leh Taitesena Group YMA atangin hnatlang an thawkchhuak tawh a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy