Daily Newspaper

Chuhvel ramah state pahnih police duty ngawrh; K Vena leh Himanta te laka thehluh FIR hnukkir

9

Mizoram leh Assam te’n ramri chungchanga silai an hmeh puah hnuah state pahnihte hian dawhkan kila inbiak an remti a, police erawh an la hnukkir lo ve ve. Silai puahna Vairengte bakah hmun dangah pawh state pahnihte hian police an la dah a, Chuhvel lama pawh an la duty ngawrh hle tih thu dawn a ni.

Chuhvel lamah hian Mizoram Police leh Assam Police hi an inbun nghet rih khawp mai a, a lehlam lehlam hi an inbun nghet telh telh rih tih thu dawn a ni.

July ni 12 khan Chuhvel ramah hian Assam lam kuthnu, kawng laih tumna hnuhma hmuh a ni a, chumi hnu chuan state pahnih te’n police an dah nghal. Kawng laih tumna hnuhma an hmuhna hmunah chuan Mizoram Police an awm nghal a, chuta tanga Assam hnaih lam tlang bawkah an awm bawk. Chumi tlang bawk piahah chuan Assam Police an awm ve thung.

State pahnih police-te hi tlang bawkah ve ve an awm a, an inkar chu phai ruam a ni. Thawm pawh an inhre pha a, mobile phone-in thla a lak phak tih thu dawn a ni.

State pahnih karah hian inremna lam hawi sawi tur a awm a; Assam-in Mizoram MP K Vanlalvena laka FIR an thehlut an hnukkir a, Mizoramin Assam chief minister laka FIR an thehluh an hnukkir bawk.

August ni 2 zing lam dar 1 velah khan Assam chief minister Himanta Biswa Sarma chuan twitter-ah Mizoram MP laka FIR thehluh chu hnuhkir a nih thu a puang a, he case hi ‘withdraw’ tura Assam Police te a hriattir thu leh, mahse July ni 26-a thil thleng chungchanga mi dang laka FIR thehluh tawh erawh a kal zel tur thute a sawi. A tukah Mizoram chief minister Zoramthanga’n instagram-ah July ni 26-a thil thleng chungchanga Vairengte Police Station-a FIR thehluhte hnukkir tura Mizoram Police te a hriattir thu a post ve bawk. Chumi hnu-ah Assam Chief Minister-in Kolasib DC leh Vairengte SDPO te laka FIR lut chu hnuhkir a ni ang tih a sawi ve leh.

Vairengte Police Station-ah hian Assam chief minister, IGP, DIG, Cachar DC, DFO leh Dholai OC te lakah FIR thehluh a ni a, Thawhtanni kha inlan tura tih ni a ni nghe nghe. Mi tihhlum tuma puhna case siamsak an ni. Mizoram MP K Vanlalvena pawh August ni 1 kha Lailapur Police Station-a inlan tura koh ni a ni a, a inlan lo.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy