Manipur sorkar chuan Zirtawpni khan Churachandpur-ah ni nga chhung atan internet service a titawp a, hei hi police station mipui tena an beih vang a ni.
Churachandpur-a superintendent of police leh deputy commissioner office te chu suasam niin CAPF tena vehicle an hman te pawh mipui thinrim ten halin Sp office complex-a national flag intar pawh pawhthlak a ni tiin official te chuan an sawi a.
Anti-social ten social media chu thlalak, post leh video message siama mipui chawhthawhna an kalpui theih avang leh chu chuan dan leh hrai lekkawhah harsatna nasa tak a thlen thei dawn bawk a, nunna chan hlauhawmna te mimal leh sorkar property tihchhiatna te leh remna leh muanna tichhe thei te a thlen theih vangin internet service tihtawp lailawk a nih thu hriattirna chhuah chuan a tarlang a.
Ninga zan khan district police head constable chu video-a silai kengte nena hmuh an nih avangin suspend a ni a, chu mi duh lo chuan mipui thinrim chuan government complex luhchilhin chet an la a ni tiin official te chuan an sawi.
Security forces te chuan tear gas shell te kapchhuakin lungawilote hnawhdarha thunun nan lehtal force te pawh an hmang tiin sawi a ni bawk a. Tualchhung mite chuan mi 30 chuangin hliam tuarin mi pakhatin nunna a chan an ti.
Churachandpur-a inbun Indigenous Tribal Leaders Forum (ITLF) te chuan police kuta mi pakhat nunna chan chu an duh lohzia lantir nan Zirtawpni khan shutdown an kalpui zui bawk a.
Mipuite chuan head constable suspend-na chu hlip nghal tura ngiatin an suspend chhan chu a dik lo an ti a ni.
State PWD Minister Govindas Konthoujam, Chief Minister N Biren Singh nena inhnimhnai tak chuan Churachandpur BJP MLA Paolienlal Haokip chu demin ‘hate campaign’ a kalpui tiin a sawi bawk a.
ITLF te chuan thuchhuah an siam zuiah, “SP in darkar 24 chhungin suspention order a hnukkir ngei tur a ni,” an ti bawk.
Churachandpur-ah internet service titawp
