Daily Newspaper

City an chak nghal

13

Pathianni zan khan English Premier League-ah champion tura rinkai ber pawl Manchester City chuan season thara an game hmasa ber an khel a. Khualmual tha taka inlan in Wolves an hneh in hnehna hnehna nen bul an tan. Inkhel dangah Aston Villa chuan hun rei tak chhung tlem zawk ni chunga inlan Sheffield United chu si khat faiin an hneh ve hram bawk.

City in bul tan tha
Premier League champion hlui, season hmasaah Liverpool hnuaiah awm a, pahnihna ni ta City hi Molineux Stadium-ah an lenglut a, Europa League tal khelh phak ngei tuma tan khawh Wolves an hmachhawn. Wolves an hma-chhawn tum hian City player thar Nathan Ake khel nghalin,a che velin mit a la viau a, City tlarhnung thuamchaktu pawimawh tak a ni nghal.

Pep Guardiola team City hian tan phat atangin an khingpuite an nawr nghal chat a, an hlauhawm nghal hle. Raheem Sterling leh Phil Foden ten goal an thun teuh viau a, si nghak Rui Patricio-a’n tha takin a dansak hlauh thung. Minute 20-naah City hian penalty an hlawhchhuak. He penalty hi Professional Footballers’ Association Player of the Year Kevin de Bruyne chuan chiang zetin a pet goal a, hmahruaina goal a thun.

De Bruyne goal thun hnu hian City in an khel tha zui hle a, goal pawh an thun leh thuai. Minute 32-naah khel tha tak Phil Foden chuan goal a thun belh a, si hnih faia hmahruai chungin chawlhlawk an hmang. Phoden hian City vawi 33 bul a tan tawhah goal 22 zetah a inhnamhnawih a, goal 12 a siam bakah vawi 10 asstist a nei bawk a, hnuhma a nei tha hle.

Chawlhlawk hnu lamah pawh City an khel tha zui zel a, goal erawh an thun belh mai thei tawh bik lo. Minute 78-naah Wolves in hun tha an neih hmasak berah Raul Jimenez chuan tauh goal in, an si phurh sutna goal a thun. Jinemez goal thun vangin mualneitu lam hi an phur thar a, an mualah point hlawhchhuah hram tumin thapui an thawh zui zel. Goal thun ngei tuma tan an khawh laiin goal chhuah zawkah an tang leh ta tlat thung.

Hun pangngai tawp hnu minute 90+5-ah Gabriel Jesus chuan an chakna nem nghet turin goal a thun belh leh a, goal dang luh belh lohin inkhel a tawp a, City chuan khualmualah tha taka bul tan in, point thum an hlawhchhuak zui ta a ni.

Wolves hian an player tha pahnih; Matt Doherty leh Diego Jota te an hralhchhuak tawh a, an player tha pahnih chhuak tate hmunruak hi an la hnawhkhah hman si loh vangin ngai an la awh lo hle tih a hriat theih. Wolves hian Barcelona defender Nelson Semedo lak tumin hma an la mek a, Semedo hi an la thei a nih chuan Matt Doherty hmunruak an hnawhkhat thei ngei tura ngaih a ni. Liverool lam pan ta Jota hmunruak pawh hnawhkhah hautak tak tura ngaih a ni bawk.

Wolves hnehtu City hian EPL record thar an siam a, EPL season 10 chhung zet chu an math hmasa berah hnehna an chang zawn a, hetiang ti thei hmasa ber leh awmchhun an ni. Wolves tana goal thuntu Jimenez khan season hmasa tan tirh atanga tun thlengin vawiruk ngawt a tauh goal tawh a, hemi chhung hian EPL player zingah amah aia tauh goal tam an awm lo.

Villa an chak hram
Thawhtan zana EPL inkhel dangah Tottenham chuan season hmasaa chetha tak Sheffied United an hmachhawn a. Hun rei zawk chhunga tam zawk an hnih chhawr tangkaiin si khat faiin hnehna an chang hram.

Villa Park a inkhelah hian tan atanga minute 12-na lekah Sehffield United player John Egan chuan red card a hmu a, hnawhchhuah nghal a ni. Sheffield United boss Chris Wilder chu Egan hnachhawh danah a lawm lo hle a, referee Graham Scott thutlukna a sawisel nasa hle.

Hun rei tak chhung chak zawk an nihna hi hun tawp dawn hnaih lamah an chhawr tangkai thei hram a, minute 63-naah Ezri Konsa chuan tauh goal in an chakna goal hlu tak a thun a, an mualah point thum hlutak an hlawhchhuah phah ta hial a, team chetha tak lakah hnehna an chang ta a ni.

(THE AIZAWL POST – Infiamna)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy