English Premier League thuneitute chuan EPL champion lai Manchester City sum hman dan an chhui chiang a. Financial rules bawhchhiaa an puh City an trophy kawl mek laksak emaw, EPL atanga tlahniam thut thei dinhmunah an ding mek a. EPL puhna hi City hian an chhanglet ve tawh bawk a, boruak a inmung lian sawt hle.
Premier League chuan Club hausa thar Manchester City hi kum 2009-2010 season atang khan an sum hman dan chungchangah rinhlelh rukna neiin an lo chhui tan tawh a. 2009-2010 season atanga 2017-2018 season inkar chhung zawng kha chhui chiang in, finalcial rules 100 chuang zet City hian an bawhchhe ngei niin an hria. City hian dan tam tak an bawhchhe ngeia an hriat vangin Premier League hian independent Commision hnenah an thlen a, Court sang zawkah an kalpui chhunzawm zel rin a ni.
Manchester City chhuitute hian EPL champion ni mek City hian club revenue, Sponsorship atanga sum an lak luh te, operating cost bakah an manager hlawh an pek dan chungchangah document fel tawk lo an thehlut tih an hmuchhuak a. AN chungah hremna lek kawh a nih theih nan hma an la chhunzawm ngei tura ngaih a ni.
An puhna atanga an insawi fihlim zo lova, thiam loh an chang a nih chuan City hian hremna na tak an tuar thei dawn a. EPL champion an lo nih tawhna hlihsak in hrem theih an ni a. Season kal meka an point hmuh paihsak emaw, Championship lama tlakhniam tir thlengin hrem theih an ni tih tarlan a ni.
Hremna na tak tuar thei dinhmuna ding mek City hi kum 2020 khan Europe a football thuneitu sang ber UEFA pawhin an lo ringhlel tawh a. UEFA hian City hi kum hnih chhung European competition hmachhawn thei lo turin an lo hrem hial tawh. UEFA hremna hi infiamna lama Court sang Arbitration for Sport (CAS) ah an khing let a, thiam an chan hlauh vangin hream an tuar zui lova, European competion an hmachhawn zui thei. Premier League puhna ata an fihlim zui leh thei ang em tih zawhna lian tak a awm mek a. An fihlim thei lo a nih chuan manager Pep Guardiola leh player hrawl tak ch^n puk thei dinhmun derthawngah an ding mek.
EPL club vantlang tak ni thin Manchester City hi kum 2008 khan sumdawng hausa Abhudabi Group in an lei a, an hausa thar thut. Neitu thar hnuaiah player tha tak tak an la lut a, inelna hrang hrangah an hlawhtling zui ta viau nghe nghe. 2008 hnu lamah hian Premier League-ah vawi ruk zet an champion tawh a, champion lai an ni mekin, season kal mekah pahnihna an ni mek bawk. EPL ah vawi ruk an champion tawh bakah hian League Cup-ah vawi thum an champion a, FA Cup-ah vawikhat an champion tawh bawk.
Puh hmingchhiata awm mek Manchester City hian Premier League puhna chhangletin thuchhuah an siam a. An mahni chhuitute tha taka an thawhpui chung leh felfai taka thil an kalpui chunga puhchhiat leh rinhlelh an la ni cheu chu an hriat thiam loh thu an tarlang.
City hian an thuchhuah ah, “Premier League dan bawhchhiaa buh kan ni ta mai hian min thawng hle a. Independent commission lamin buaina inmung mek belchiang a, an thlithlai tha leh tur hi lawmawm kan ti a. Hleih nei lova rorel a, chik taka finfiahna zawng zawng zirchiang a, thutlukna dik tak siam ngei turin kan duh a. Buaina min thawng harh leh thintu hi a tawp fel hlen kan beisei tak zet a ni:, an ti.